TULO ka mga pulis nga nadestino sa Davao Oriental Police Provincial Office nagpositibo sa methamphetamine hydrochloride (shabu) human sa gilusad nga random drug testing sa Police Regional Office-Davao Region (PRO-Davao).
Ang pinakalit nga drug test maoy kabahin sa Philippine National Police (PNP) internal cleansing program nga gimando ni PNP chief General Rommel Francisco Marbil.
Ang tulo ka mga pulis dali gilayong gidis-armahan ug gikuhaan og tsapa samtang ipailawom sila sa prosesong administratibo subay sa mga polisiya sa PNP.
Gipahimug-atan ni Police Brigadier General Leon Victor Rosete, PRO-Davao regional director, sa kamahinungdanon sa regular drug testing aron nga mapabilin ang integridad sulod sa han-ay sa kapulisan.
“This is a reminder that internal cleansing is a shared responsibility. Our goal is not just to detect violations but to help our personnel stay on the right track. We continue to uphold the highest standards of service while also providing opportunities for growth within our ranks,” matud sa opisyal.
Sa miaging semana, usa ka patrolman gikan sa New Bataan, Davao de Oro nagpositibo sab nga tiggamitan og ilegal nga druga. Sumala sa tigpamaba sa PRO-Davao, Police Major Catherine Dela Rey, ang pulis gipailawom sa imbestigasyon ug mag-atubang og pagkataktak sa trabaho kung mapamatud-an nga sad-an.
Gitubag sab ni Dela Rey ang nikatag nga huhungihong sa online nga naglambigit kaniya sa ilegal nga kalihukan, nga nikatap pinaagi sa usa ka vlogger sa social media. Iyang gihimakak ang pangangkon, ug nagkanayon nga ang mga akusasyon way basehan ug nimugna og pagsaway sa Facebook.
Dugang gitin-aw sa PRO-Davao nga walay high-ranking officers ang nalambigit sa bag-ohay lang mga kaso sa druga, nag-alkontra sa pagpakatap og sayop nga impormasyon sa online.
Subling gikanayon sa kapulisan nga tanan nilang personahe nga masayran nga naggamitan og ilegal nga druga ipailawom sa "due process and disciplinary action", isip kabahin sa padayong paningkamot sa ahensiya sa pagpabalik sa pagsalig sa publiko ug propesiyonalismo sa han-ay sa kapulisan. (David Ezra Francisquete)