TACURONG CITY -- Kabsan sa kinabuhi ang tulo ka tawo human malumos sa Lebak ug Kalamansig, Sultan Kudarat Province, Sabado, Mayo 24, 2025.
Kini human sa kusog nga ulan ug kalit nga pagsaka sa lebel sa tubig nunot sa nasinating Intertropical Convergence Zone (ITCZ), pagkompirma ni Sultan Kudarat Provincial Disaster Risk Reduction and Management Office Officer Lovely Joy Hallegado.
Gibutyag ni Hallegado nga mga nalumos sa Sitio Kitay, Barangay Salaman, Lebak mao sila Maila Pulido, 43 anyos, ug ang anak niini nga si Mylene, 12.
Nasayran nga pauli na unta ang mga biktima sa ilang balay apan napugos sila sa pagtabok sa sapa taliwala sa kusog nga ulan.
Unang naanod ang bata, ug gisuwayan pagluwas sa inahan, apan silang duha na hinuon ang naanod sa kusog nga bul-og sa tubig. Napalgan ang ilang mga patay'ng lawas kapin sa duha ka oras human sa hitabo.
Sa Barangay Cadiz, Kalamansig, nalumos sab si Lawrence Itew, 8 anyos, samtang nanguha og mga lubi sa suba uban sa duha ka higala.
Atol sa search and retrieval operation, napalgan ang iyang patay'ng lawas sa Poral Beach, Sta. Maria.
Dugang ni Hallegado nga 15 ka pamilya sa Lebak ug 21 ka pamilya sa Kalamansig ang apektado sa pagbaha.
Gipahimangnoan ni Hallegado ang publiko nga likayan ang pagtabok sa sapa ilabi na kung kusog ang bunok sa ulan. (Edgar E. Fuerzas)