KIDAPAWAN CITY -- Usa ka makasaysayanong panghitabo ang graduwasyon sa 32 ka mga piniriso sulod sa North Cotabato District Jail sa Barangay Amas, Kidapawan City.
Dakong kalampusan kini sa mga binilanggo sa NCDJ.
Pinaagi sa Alternative Learning System (ALS) program sa Department of Education (DepEd), ang mga enrolled inmates nagtuon pinaagi sa DepEd-President Roxas South District sa pakigtambayayong sa Bureau of Jail Management and Penology (BJMP).
Sa kinatibuk-an, 25 ang nigraduwar sa Junior High School -- 20 ka lalaki ug lima (5) ka babaye. Samtang pito (7) ang nigraduwar sa elementary school.
Nagpasalamat ang mga benepisyaryo sa programa ug inisyatibo tungod kay nagmabungahon ang ilang panahon bisan pa og gihikawan sa kagawasan.
Matud sa mga opisyal sa BJMP ug DepEd-President Roxas, padayon nila nga hatagan og kahigayonan ang mga priso nga makatuon ug makatapos bisan pa nga napriso sila.
Kini gilauman nga makatabang kanila sa paglambo kung sila mobalik na sa tagsa-tagsa ka komunidad.
Sa pikas bahin, subli nga gipanawagan sa Committee on Human Settlements and Development sa Bangsamoro Parliament ang hinanaling suporta sa pabalay nga programa alang sa mga pamilya nga nawad-an og pinuy-anan tungod sa Bagyong Paeng.
Ang komite nakigtagbo uban sa Ministry of Human Settlements and Development (MHSD) nga nagtaho sa nagpadayon nga koordinasyon sa mga lokal nga gobyerno sa pag-ila sa mga resettlement sites.
Gipaambit usab ni MHSD Director General Esmael Ebrahim nga 300 ka housing units sa Datu Odin Sinsuat, Maguindanao del Norte Province ang gisugyot ubos sa 2026 budget plan sa ahensiya.
Kini tubag sa resolusyon nga nag-awhag sa Barmm ministries ug LGUs nga unahon ang permanenteng solusyon sa pabalay para sa mga apektadong komunidad.
Ang Bagyong Paeng niigo niadtong 2022 ug nakaapekto sa kapin sa 200,000 ka pamilya sa tibuok rehiyon, diin ang Maguindanao del Norte Province maoy usa sa labing grabeng naigo.
Ang komite nag-ingon nga makigtagbo kini sa mga hingtungdan nga Ministries aron sa dugang nga paghisgot sa kahimtang sa mga programa sa pabalay ug pagseguro nga ang teknikal, badyet, ug mga kinahanglanon sa pagplano matuman. (Edgar E. Fuerzas)