GITAHO sa Department of Social Welfare and Development–Davao Region (DSWD-Davao) nga mga 38,595 ka pamilya sa rehiyon mo-gradweyt na gikan sa Pantawid Pamilyang Pilipino Program (4Ps) karong 2025.
Sumala sa taho sa DSWD-Davao, sa kinatibuk-ang 38,595 ka pamilya nga gitakdang mogradweyt gikan sa programa, 4,374 niini gikan sa Davao City; 7,411 sa Davao de Oro; 8,374 sa Davao del Norte; 6,349 sa Davao del Sur; 4,773 sa Davao Occidental; ug 7,314 gikan sa Davao Oriental.
Gisulti sa DSWD-Davao nga ang mga pamilya nga mahuman karong tuiga, kapin sa 95 porsiyento naa sa programa sa kapin 12 ka tuig na, ug 27.8 porsyento na-enrol sulod sa 14 ka tuig.
Gitin-aw ni Margie Cabido-Sobretodo, division chief sa 4Ps sa DSWD-Davao, nga sukad sa pag-implementar sa balaod niadtong 2019, karong tuiga lang nagmarka og pinakadaghan nga makahuman nga benepisyaryo. Iyang gi-esplikar nga ang transisyon mao ang pagtuman sa Republic Act (RA) 11310, labing nailhan isip "Pantawid Pamilyang Pilipino Program (4Ps) Act," partikularmente sa Rule 4 ug section 34.
Gitataw ni Sobretodo nga ang Section 4 sa RA 11310 nagkanayon nga ang mga benepisyaryo mahimo lang magpabilin sa programa hangtud sa pito ka tuig, katapusang namonitor nga bata nag-edad na og 19-anyos ug nakatapos na og high school, ang pamilya di na gyud kabus basi sa bag-ohay nga pagsusi gamit ang "standardized targeting system", o boluntaryong mobiya ang mga benepisyaryo, o makahimo og kalapasan o salaod nga makompirma nga wad-on sila sa listahan basi sa standards sa DSWD.
Gibutyag sab niini nga sa 4.4 milyon nga benepisyaryo sa tibuok nasud, mga 1.8 milyon mahuman na sab programa nga mag-abli og oportunidad alang sa bag-ong pamilya nga malakip.
Apan iyang gitin-aw nga way application process aron nga mahimong benepisyaryo sa 4Ps, ug ang DSWD wala magmentinar og listahan niadtong nagpalista. Iyang gitin-aw nga ang pagpili og mga benepisyaryo dili na ilawom sa departamento apan gikoordinar uban ang Philippine Statistics Authority (PSA) pinaagi sa Community-Based Monitoring System (CBMS). Ang rehistrasyon gilauman nga magsugod sa 2026.
Si Angeli C. Nacorda, regional case management officer alang sa 4Ps sa DSWD-Davao, nagsulti nga aron suportahan ang mahuman nga mga pamilya sa 2024 ug 2025, magpatuman sila og THRIVE framework. Kini nga paagi magtutok sa pag-ebalwar sa kalampusan sa pamilya atol sa ilang panahon sa programa ug mag-andam kanila alang sa kinabuhi human sa graduwasyon.
“We will be gauging the readiness to exit the program and to also find the gaps that need to be addressed to ensure their resilience post program,” tataw niya atol sa Kapehan sa Dabaw, Lunes sa buntag, Hunyo 9, 2025, sa SM City Davao.
Dugang pa ni Nacorda nga magdebelop sab sila og household intervention plans aron paggiya sa paghatud sa gikinahanglan nga suporta. Kini nga mga plano mosunod og proseso sa "referral, resource engagement, and convergence". Mahuman nga mga pamilya i-endosar ngadto sa ilang tagsa-tagsa ka LGUs ug imonitor sulod sa unom hangtud 12 ka bulan human mohawa.
Gisulti sab ni Jerise Ann M. Pendio, MCCT ug ESSI focal person sa DSWD-Davao, naghanyag sab sila og education and skills development programs ngadto sa mga benepisyaryo, apil ang scholarships and vocational training gikan sa Technical Education and Skills Development Authority (TESDA), educational assistance gikan sa Commission on Higher Education (CHED), ug suporta gikan sa uban pang kaubang mga ahensiya.
Gipahimug-atan ni Pendio ang kamahinungdanon sa suod nga pagkolaborasyon uban ang Local Government Units (LGUs) aron motabang sa pagpanday og mga ordinansa nga magpalapad pa sa support program sa nigraduwar.
Matud niya nga ang pagpakiglambigit sa LGU bililhon alang sa hapsay nga transisyon sa pamilya. (Rojean Grace G. Patumbon)