NAKATAKDANG mopiyansa ang upat ka mga babaye nga nadakpan sa National Bureau of Investigation Southeastern Mindanao Regional Office (NBI-Semro) gumikan sa ilegal nga pagpamaligya og raw lots.
Sa impormasyon nga nakalap sa SuperBalita Davao, karong adlawa, Lunes, Hunyo 23, 2025, nakatakdang mopiyansa ang mga nahisgutan subay sa ilang kaso nga Estafa ubos sa Article 315 sa Revised Penal Code ug paglapas sa Presidential Decree (PD) No. 957 kun Subdivision and Condominium buyer's Protective Decree.
Sumala sa NBI-Davao nga katungod sa mga nahisgutan ang mopiyansa aron ilang mas pangandaman pa ang mosunod nga mando sa korte labot sa ilang kaso.
Una niini, sumala ni NBI-Davao spokesperson Atty. Ely Leaño nga bunga kini sa ilang gihimo nga entrapment operation human sa mga reklamo sa ilang nabiktima.
Giingon ni Atty. Leaño nga ang maong mga suspek giingong nagtrabaho isip mga office staff sa usa ka establisemento sa Buhangin Teachers Village, Brgy. Buhangin Proper nga maoy gigamit nga opisina sa ilegal nga binuhatan.
Nasayran nga makita sa gawas sa ilahang opisina ang pagpamaligya og mga cosmetics products, nagpakaaron-ingnon nga marketing consultancy, apan ang modus gipahigayon sa sulod.
Ang modus sa mga suspek ang paghanyag sa ilahang mga kliyente nga mopalit og luna sa Brgy. Callawa, Buhangin District, Davao City sa mas baratong presyo.
Ang mga nahisgutan walay napakitang legal nga dokumento sama sa Certificate of Registration ug License to Sell diin nagpamatuod nga ilegal ang ilang gihimong mga transaksiyon. (Jeepy P. Compio)