Nagkaareglo na ang mga drayber sa upat ka mga motorsiklo nga nangadisgrasya Davao-Bukidnon Road, Km 21, Barangay Los Amigos, Tugbok District, Davao City alas 12:58 sa udto niadtong Dominggo, Hunyo 29, 2025.
Sumala sa blotter sa kapulisan sa Los Amigos Police Station nga mga motorsiklo nagdagan sa samanag direksiyon padulong sa Barangay Mintal Proper gikan sa Barangay Calinan Proper.
Sa dihang nahidangat sa nahisgutang lugar, usa mga motorsiklo ang nikalit og preno nga maoy hinungdan nga ang laing tulo ka mga motorsiklo nangabagnos sa kalsada atubangan lang sa Los Amigos PNP.
Mga drayber nakaangkon og gagmay nga mga angol sa nagkadaiyang parte sa lawas ug nakaangkon sab og wala matino nga danyos sa ilang mga motorsiklo.
Dali sab dayong niresponde ang kapulisan ug responder sa Los Amigos ug gitabangan ang mga biktima.
Nasayran nga mga motorsiklo nga nalambigit mao ang Yamaha Nmax ABS BKT2, kolor matte dark gray/black, dunay plaka numero L316BG, gipanag-iya ug gimaneho ni Khoji Beau Agbayani Kwok, 21-anyos, ulitawo, ug molupyo sa Block 5 Lot 35, Fortune Homes, Lanang, Davao City; ikaduha mao ang Yamaha Mio Aerox S BRW, kolor matte black, nagdala sa plaka numero 112 MUB, gipanag-iya sa usa ka Allen C. Guerrero, gimaneho ni Patrick Faith Caduada Guerrero, 23-anyos, ulitawo, ug molupyo sa New Washington Village, Ma-a, Davao City; ikatulo mao ang Yamaha Nmax ABS BKT3, kolor dark blue/matte black, nagtangag sa plaka numero L916GA, gipanag-iya ni Orlando San Juan Olden, gimaneho ni Cyrel Robledo, 22-anyos, ulitawo, ug molupyo sa Phase 5, Doña Asuncion, Dalia St. Pampanga, Davao City; ug ang ikaupat mao ang Yamaha Nmax ABS BKT4, kolor dark blue/matte black, nagdala sa plaka numero L128LI, gipanag-iya ni Zeus Daniel Villaflor, gimaneho ni Robert Bryan Tengson Sagabaen, 22-anyos, ulitawo, ug molupyo sa Block 18 Lot 14, Mabolo Street, Ciudad de Esperanza, Davao City.
Base sa blotter sa kapulisan ang mga nahisgutan pulos mga ulitawo. (Wenz G. Mendoza)