KASONG Estafa ubos sa Article 315 sa Revised Penal Code ug paglapas sa Presidential Decree (PD) No. 957 kon Subdivision and Condominium Buyer's Protective Decree ang atubangon sa upat ka mga dinakpan kinsa illegal nga namaligya og mga "raw lots" nga walay mga kompletong dokumento.
Ang mga nahisgutan pulos mga babaye kinsa gipresenta kagahapon, Hunyo 20, 2025, sa National Bureau of Investigation Southeastern Mindanao Regional Office (NBI-Semro) Davao ngadto sa mga sakop sa media.
Gisaysay ni NBI spokesperson Atty. Ely Leaño nga bunga kini sa ilang gihimo nga entrapment operation human sa mga reklamo nga nabiktima sa mga nahisgutan.
Giingon ni Atty. Leaño nga ang maong mga suspek giingong nagtrabaho isip mga office staff sa usa ka establisemento sa Buhangin Teachers Village, Brgy. Buhangin Proper nga maoy gigamit nga opisina sa ilegal nga binuhatan.
Nasayran nga makita sa gawas sa ilahang opisina ang pagpamaligya og mga cosmetics products, nagpakaaron-ingnon nga marketing consultancy, apan ang modus gipahigayon sa sulod.
Ang modus sa mga suspek mao ang paghanyag sa ilahang mga kliyente nga mopalit og luna sa Brgy. Callawa, Buhangin District, Davao City sa mas baratong presyo.
Dugang nasayran nga nagsugod ang ilahang ilegal nga aktibidad niadtong 2019 ug gibana-banaang anaa na sa 100 ang mga tawo nga nabiktima.
Ang mga nahisgutan walay napakitang legal nga dokumento sama sa Certificate of Registration ug License to Sell diin nagpamatuod nga ilegal ang ilang gihimong mga transaksiyon.
Ang NBI-Semro padayong misubay sa hitabo ug gipangita ang posibleng nangulo sa maong ilegal nga subdivision developer samtang ang mga nahisgutang upat nga nadakpan temporaryong gipangbalhog sa selda sa NBI-Davao. (Jeepy P. Compio)