ANAA na sa luwas nga kahimtang ang upat ka mga sakop sa Special Action Force (SAF) sa Philippine National Police human sila nadisgrasya samtang sakay sa PNP SAF vehicle pasado alas 4 sa kaadlawon, kagahapon, Huwebes, Mayo 16, 2024, sa McArthur Highway, Brgy. Bago Aplaya, Davao City.
Si Davao City Police Office (DCPO) spokesperson Police Captain Hazel Tuazon nagkompirma nga ang upat pulos mga nakahiagom og mga minor injuries.
Dugang ni Tuazon nga ang upat mga miyembro sa elite unit sa PNP ug dili taga DCPO.
Ang Baliok Police Station nagpadayon sa paghimo og imbestigasyon sa maong hitabo.
Suma sa Baliok PNP, usa ka self-accident ang nahitabo, apan nagpadayon gihapon ang ilang makuting imbestigasyon sa disgrasya.
Una niini, perteng pagkabalintong sa usa ka Mitsubishi Truck dunay plate number SFV 487 nga gimaneho sa usa ka Police Officer.
Giingon nga gikan sa Toril nga bahin ang nahisgutang trak, apan pag-abot sa lugat misarasay kini gumikan sa kadangog sa dalan.
Human sa hitabo gipangdala dayon sa Southern Philippines Medical Center ang upat ka mga pulis.
Wala nay angay kabalak-an ang kahimtang sa upat ka mga biktima. (Jeepy P. Compio)