PASAKAAN og kaso nga kalapasan sa Republic Act 9165 o Comprehensive Dangerous Drug Act of 2002 ang upat ka drug pushers nga nadakpan sa mga awtoridad sulod sa gipuhag nga drug den alas 3:05 sa hapon, Miyerkules, Hulyo 2, 2025, sa Datu Odin Sinsuat, Maguindanao del Norte Province.
Giila ang mga suspek nga sila alyas Kadiguia, 40-anyos; alyas Aratuk, 35-anyos; alyas George, 25-anyos; ug alyas Jibrel, 28-anyos nga pulos molupyo sa Sitio Pangi, Barangay Taviran, Datu Odin Sinsuat.
Apan duha ka drug den operator ang nakaikyas atol sa gilusad nga ronda sa mga awtoridad.
Matud sa kapulisan nga ang maong operasyon, base sa impormasyon sa usa ka confidential informant, kalabot sa grabeng pagpamaligya og shabu sa maong dapit.
Human sa pipila ka adlaw nga surveillance, gihimo ang operasyon sa ginsakpan sa Datu Odin Sinsuat Municipal Police Station Drug Enforcement Unit, sa pakigtambayayong sa Philippine Drug Enforcement Agency sa Bangsamoro Autonomous Region in Muslim Mindanao ug uban pang yunit sa kapulisan.
Nasakmit atol sa operasyon ang gibana-banang 2.016 gramos nga shabu nga adunay gibana-bana nga street value nga P13,708 base sa Dangerous Drugs Board Valuation.
Narekober usab ang marked money, drug paraphernalia, cellphone, identification card, ug uban pang personal nga gamit.
Gidala ang mga suspek ngadto sa Datu Odin Sinsuat MPS alang sa booking, dokumentasyon, ug drug testing.
Giandam na ang pagduso sa kaso ngadto sa Provincial Prosecutor’s Office batok sa mga nadakpan.
Samtang padayon usab ang follow-up operation sa kapulisan batok sa naka-iskapo nga mga operators sa drug den. (Edgar E. Fuerzas)