UPAT nga nigraduwar gikan sa mga unibersidad sa Davao City nakaambit og luna sa Top 10 sa May 2025 Certified Public Accountant Licensure Examination (CPALE), sumala sa resulta nga gipagawas sa Professional Regulation Commission (PRC) kagahapon, Hunyo 4, 2025.
Si Rica Mae Davis Marbebe sa University of Mindanao, Davao City, nahiluna sa ika-5 uban ang grado nga 90.33 percent.
Axelvhox Diaz Ompod ug Lyle Joyce Mondroid Saturninas, pulos gikan sa University of Southeastern Philippines (USeP) – Davao City, nagtabla sa ika-6 nga luna uban sa grado nga 90.17 percent.
Si Jasper Gementiza Enumerables, gikan sab sa University of Mindanao, Davao City, naa sa ika-8 uban ang grado nga 89.67 percent.
Si Lyle Joyce M. Saturninas, usa sa mga topnotchers gikan sa USeP, nitapos nga summa cum laude ug valedictorian sa Class of 2024. Nakuha niya ang iyang accountancy degree gikan sa USeP usa ka tuig ang nilabay.
Nagpahibalo ang PRC nga 3,156 sa 9,533 examinees nipasara sa May 2025 CPALE, nga niresulta sa 33.11 percent national passing rate.
Ang pasulit gihimo gikan Mayo 25 hangtud 27 sa nagkadaiyang testing centers sa tibuok nasud, apil ang Metro Manila, Baguio, Butuan, Cagayan de Oro, Cebu, Davao, Iloilo, Koronadal, Legazpi, Lucena, Pagadian, Pampanga, Rosales, Tacloban, Tuguegarao, ug Zamboanga.
Si John Elrich Ramirez Gamboa gikan sa University of the Philippines Diliman maoy nanguna sa eksam uban ang iskor nga 92.67 percent.
Gisundan siya ni Aleya Francis Romanes de Guzman sa De La Salle University-Manila uban ang 91 percent, ug Jianna Chelsea Suarez Iral sa Holy Angel University, kinsa naa sa ikatulong puwesto sa grado nga 90.83 percent.
Ang University of the Philippines Diliman giila isip top performing school, niangkon og 100 percent passing rate. (David Ezra Francisquete)