40 kolehiyo magpataas sa twisyon

40 kolehiyo magpataas sa twisyon
File photo

GITAHO sa Commission on Higher Education-Davao Region (Ched-Davao) nga moabot sa 40 ka regional higher education institutions (HEIs) ang niaplay aron nga mopataas sa ilang matrikula alang sa school year 2024 hangtud 2025.

Gikanayon ni Dr. Christopher Pio O. Pulido, supervising education program specialist sa Ched-Davao, atol sa paghinabi sa mga tigbalita, Biyernes sa buntag, Mayo 10, 2024, sa University of Southeastern Philippines (USeP) Gymnasium, nga 40 ka HEIs kasagaran gikan sa Davao City ug kini mas taas itandi sa aplikante sa niaging tuig nga 22 HEIs.

Dugang ni Pulido nga ang importante alang sa Ched-Davao mao nga ang pagpatuman sa ilang usbaw di taas ra kaayo tungod kay walay balaod nga nagdili sa HEIs gikan sa pagpataas sa ilang bayad basta mosunod lang sa saktong proseso.

Usa sa importante nga proseso mao ang pagkonsulta sa mga tinun-an tungod ang mga tinun-an makasulti kung unsa ang ilang hunahuna bahin sa usbaw. Mahimong motingog ang mga tinun-an bahin sa pagtaas sa matrikula.

Matud sa opisyal nga ang Ched nasayud nga kon dunay pagtaas, kinahanglan naa kini sa inflation rate nga naa karon sa 6.3 porsiyento.

Iyang gisulti nga ang pipila ka mga hinungdan kung nganong mga tulunghaan magpataas sa ilang matrikula nga mao ang pagpataas sab sa suholan sa ilang mga magtutudlo ug empleyado base sa wage hike sa Department of Labor and Employment (DOLE). Ang pagtaas sa matrikula makatabang kanila makapalambo sab sa ilang pasilidad.

Tambag sa Ched-Davao nga kon ang mga tinun-an di na makakaya sa bayad sa pribadong HEICs, mas maayong mobalhin sa mga unibersidad ug kolehiyo sa gobyerno kon diin ang pagtuon libre. (Rojean Grace Patumbon)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph