GIILA sa Ministry of Social Services and Development (MSSD) ang kamahinungdanon nga papel sa kapin 433 Child Development Workers gikan sa Marawi City ug sa mga munisipyo sa unang distrito sa Lanao del Sur sa gipahigayon nga Provincial Day Care Workers’ Summit niadtong Hunyo 15, 2025, sa M Bistro, Marawi City isip kabahin sa kasaulogan sa BARMM Day Care Workers’ Week.
Tumong sa aktibidad nga ilhon ang mga mahinungdanon nga papel sa mga CDW sa sayong pag-atiman ug edukasyon sa mga kabataang Bangsamoro, mao sab ang paghatag og kahibalo, suporta, ug inspirasyon sa ilang propesyon.
Gihatagan sab og Loyalty Award ang 84 ka CDWs nga dunay 15 ka tuig o kapin na sa serbisyo. Matag awardee nakadawat og certificate of recognition isip pag-ila sa ilang dedikasyon sa pagpangalagad sa kabataan.
Pito (7) sab ka Child Development Centers ang gipasidunggan tungod sa hapsay nga pagpatuman sa mga Early Childhood Care and Development (ECCD) programs. Ang matag CDC nakadawat og Php 5,000 cash incentive ug certificate of recognition.
Samtang nagpaabot sab og dakong pasalamat ngadto sa MSSD ug Bangsamoro Government si Emily G. Talon, usa sa mga CDW nga gipasidunggan gikan sa Barangay Amoyong, Wao, nga halos tulo na ka dekada sa iyang pagpanerbisyo.
"Malaki po ang pasasalamat naming mga CDW lalo na sa monthly honorarium na Php 4,000 na natatanggap namin. Malaking tulong din sa aming CDC at sa mga bata 'yung mga suporta ng MSSD tulad ng learning materials, outdoor play facilities, at feeding program," butyag ni Talon.
Gituki sab sa summit ang Republic Act No. 12199 o Early Childhood Care and Development System Act nga nagtinguha nga pakusgan ang propesyonalisasyon sa CDWs, suporta sa CDCs, ug mga polisiya sa inclusive education. (PR)