436 ka pamilya apektado sa sunog sa Barangay Leon Garcia; giabagan

436 ka pamilya apektado sa sunog sa Barangay Leon Garcia; giabagan
Ramcez Villegas

MOABOT sa 436 ka pamilya ang apektado sa bag-ohay lang nga insidente sa sunog sa Barangay Leon Garcia, Agdao District, Davao City niadtong Disyembre 26, 2023.

Kini maoy gikanayon ni Julie Dayaday, Officer-in-Charge of City Social Welfare and Development Office (CSWDO) atol sa paghinabi kaniya sa radyo Biyernes sa buntag, Disyembre 29.

Matud niya nga dunay mga 436 ka pamilya nga apektiuhan gikan sa tulo ka mga purok nga mao ang San Vicente, San Roque, ug Sto. Niño sa maong barangay.

Sa 436 ka pamilya, 243 niini mga tag-iya og mga balay, 81 mga tig-abang og balay, 306 mga sharers, 55 borders, ug upat mga caretakers. Samtang ang ihap sa mga indibiduwal nga naapektuhan moabot og 687.

Dugang ni Dayaday nga ang nadislokar nga mga pamilya temporaryong gipahimutang sa Congressman Manuel Garcia Elementary School ug pinaagi sa City Mayor’s Office ug sa CSWDO nihatag na og mga hygiene kits, pagkaon, mga batakang gamit sa kusina, ug uban pang mga butang.

Ang buhatan nagpadala na sa ilang mobile kitchen aron mag-apud-apod og pagkaon alang sa mga nasunogan.

“Ang mobile kitchen sugod 26 hangtud tonight na lang siya, nakahatag naman ta sa ilang basic needs. Sila na magluto community cooking na ing ana siya,” matud ni Dayaday.

Gawas sa tabang sa LGU, ubang mga ahensiya nakig-alayon sa CSWDO ug mga nasudnong buhatan ug niabag sa mga biktima sa sunog.

Si Senador Christopher “Bong” Go nibisita sa mga biktima niadtong Huwebes sa hapon, Disyembre 28, 2023, ug nag-apud-apod og relief goods ug tabang. Ang senador nihatag sa iyang sapatos sa usa sa mga biktima sa sunog.

Sa mao gihapong adlaw, si Davao City Mayor Sebastian Duterte personal nga nibisita sa mga biktima aron pagsusi sa ilang kaayohan ug nagdasig kanila nga moduol sa CSWDO o sa ilang barangay captain kung dunay mga butang nga ilang gikinahanglan.

Ang CSWDO padayon nga nagdawat og donasyon alang sa mga biktima sa sunog sa Leon Garcia. Kadtong buot nga modonar, mahimong mohatud niini sa Rizal Park.

Gisulti ni Dayaday nga kung mahimo di na modonar og mga "used clothes" nga nagkagidlay na inay mga tsinelas; ug mga bag-ong underwear sa mga lalaki ug babaye sa tanang sukod. Mahimo sab ang mga hygienic products sama sa sanitary napkins alang sa mga babaye, diapers alang sa mga masuso, ug infant milk.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph