MOKABAT sa 440 ka police personnel ang ipakatag sa Police Regional Office sa Bangsamoro Autonomous Region in Muslim Mindanao (Barmm) sa special geographic area (SGA) alang sa plebisito karong Sabado, Abril 13, 2024, sa mugnaon nga walo ka lungsod.
Ang 440 ka pulis naglangkob sa 100 gikan sa Regional Headquarters, 100 sa Maguindanao del Norte Police Provincial Office, 100 usab sa Maguindanao del Sur Police Provincial Office, samtang 140 gikan sa Regional Mobile Force Battalion inabagan sa military ug mga pulis sa probinsiya sa Cotabato.
Ang tigpamaba sa Barmm nga si Moh'd Asnin Pendatun nag-awhag sa mga taga-SGA nga mogawas ug mobotar sa Sabado.
Matud niya nga importante nga maaprobahan ang mga balaod nga nagtumong sa pagmugna og walo ka lungsod sa SGA.
Gidugang ni Pendatun, bisan og wala silay nakitang dagkong problema, iyang giangkon nga dako gihapong hagit ang init nga panahon busa iyang gitambagan ang mga botante nga magdala og proteksyon sa init sa adlaw.
Samtang, si Cotabato Provincial Election Supervisor IV Atty. Myla Luna-Bayao nga sama sa miaging BSKE, manual voting ang himuon sa plebisito.
Giklaro ni Bayao, ilang gipaabot nga 100 percent ang voter turn-out diin kasagaran niini anaa sa Pikit.
Kun seguridad sa botohan ang hisgutan, adunay mga mekanismo aron mahimong hapsay ug malinawon ang piniliay. (Edgardo E. Fuerzas)