ARON nga ipakita ang higpit nga pagpatuman sa balaod, nakaaresto ang Davao City Police Office (DCPO) og 441 ka indibiduwal pinaagi sa sunod-sunod nga anti-crime operations nga gilusad sa tibuok Mayo 2025.
Mga operasyon nagpunting sa mga ilegal nga druga, ilegal nga sugal, pinangita nga kriminal, ug mga way lisensiya nga mga armas.
Gihulagway ni acting city police director, Colonel Hansel Marantan, ang kampanya isip sa way puas nga komitment sa puwersa sa kapulisan ngadto sa kaluwasan sa publiko.
Iyang gidayeg sa kalampusan sa maong bulan ang lig-ong kolaborasyon sa kapulisan, lokal nga panggamhanan, mga opisyales sa barangay, ug aktibong miyembro sa komunidad.
Dugang gipahimug-atan ni Marantan nga ang mga operasyon tinukmod sa tinuod nga tinguha nga makaalagad ug makaprotekta ug ang resulta niadtong Mayo dili lang kalampusan sa kapulisan, apan usa ka produkto sa pagsalig ug kooperasyon gikan sa katawhan sa Davao.
Sa 441 ka mga naaresto, 159 niini nalambigit sa salaod nga dunay kalambigitan sa druga.
Naglusad ang DCPO og 130 ka anti-drug operations nga niresulta sa
pagkabingwit sa 619 ka gramos sa methamphetamine hydrochloride o shabu, uban ang gibana-bana nga kantidad nga P4.2 milyones, uban ang 351 ka gramos sa marijuana kantidad og kapin P42,000.
Tanang mga suspek gipasakaan na og mga kaso.
Sa kampanya batok sa ilegal nga sugal, nakaaresto ang mga pulis og 63 ka suspek ug nakasakmit og P16,925 nga kuwarta nga pusta.
Matud sa pulis ang operasyon nagpunting sa "street-level gambling" ug "small-scale operations" nga naa sa mga komunidad.
Gitutukan sab sa mga pulis ang pagsubay sa mga pinangita sa balaod.
Kinatibuk-ang 203 ka indibiduwal nga dunay nakaung-ong nga warrants ang nagdakpan, apil ang 62 nga nahan-ay isip “most wanted.”
Ang pag-aresto kabahin sa hugot nga manhunt operations sa mga nagkadaiyang kabarangayan.
Padayon sab ang paningkamot nga mga pusil nga walay lisensiya mawagtang na sa palibot. Pinaagi sa 32 ka managlahi nga operasyon, 16 ka indibiduwal ang gidakop, ug 20 ka pusil ang nasakmit.
Dugang pa niini, walo ka mga pusil boluntaryo nga gisurender, samtang pito ka lain pang uban gitunol ubos sa “Oplan Katok” nga inisyatibo, usa ka "door-to-door" nga kampanya nga nagdasig og mga tag-iya og responsableng paghupot og pusil.
Nagpasaka ang mga pulis og 18 ka mga kaso nga dunay kalambigitan sa ilegal nga paghupot og armas atol sa maong bulan.
Ang kalampusan sa DCPO niadtong Mayo kabahin sa ilang padayong estratihiya sa pagpatuman sa balaod ug pagmugna og kompiyansa sa komunidad pinaagi sa "consistent, targeted operations." (David Ezra Francisquete)