OPISYAL nga gilunsad sa Davao City Police Office (DCPO) ang lima ka simulation exercises (simex) isip kabahin sa ilang preparasyon alang sa 2025 National and Local Elections (NLE), subay sa contingency plan sa Police Regional Office-Davao Region (PRO-Davao).
Usa sa nag-unang hitabo sa simulation gihimo niadtong Mayo 2, 2025, sa Bolton Elementary School sa Poblacion District. Pangulohan sa San Pedro Police Station, ang exercise gitumong sa pagpataas sa kaandam sa kapulisan sa pagdumala sa potensiyal nga insidente nga dunay kalambigitan sa eleksiyon.
"This is only a simulation exercise. There is no cause for alarm," pasalig sa DCPO ngadto sa publiko sa pahayag, nagpahimug-at nga ang drills mao ang preventive measures aron pagseguro sa epektibo, koordinado nga tubag atol sa tinuod nga mga emerhensiya.
Ilawom sa liderato ni Police Colonel Hansel M. Marantan, acting city director sa DCPO, ang simulation nagtutok sa pagsulay sa katakus sa operasyonal, mga sumbanan sa emerhensiya, ug functionality sa critical response mechanisms, ug kahimanan. Ang tumong mao ang pagpakusog sa kinatibuk-ang kaluwasan, seguridad, ug kaepektibo sa law enforcement operations atop sa electoral period.
Samtang ang exercise nagpahimug-at sab sa kaimportante sa koordinasyon tali sa mga ahensiya sa law enforcement ug lokal nga komunidad sa pagseguro sa malinawon ug hapsay nga eleksiyon.
Sayo sa samang adlaw, nilusad sab ang DCPO og send-off ceremony alang sa mga 5,000 police personnel kinsa ipakatag sa tibuok siyudad aron pagbantay sa Mayo 12, 2025 elections.
Dugang pang reserve units gikan sa national support services, apil ang Special Action Force (SAF) ug ang Regional Mobile Force Battalion, magpabiling estambay. Ang Armed Forces of the Philippines (AFP) moabag sa Philippine National Police (PNP) sa pagmentinar sa kalinaw ug kahusay sa tibuok sa election period.
Pinaagi niining proactive nga mga inisyatibo, subling gipahayag sa DCPO ang ilang komitment sa pagprotekta sa public safety ug magpalig-on sa integridad sa demokratikong proseso sa Davao City.
Samtang nangandam ang siyudad alang sa taliabot nga eleksiyon, naglaum ang DCPO nga way kasamok nga dunay kalambigitan sa eleksiyon nga mahitabo. Nanawagan si Marantan sa mga hintungdan gikan sa mga kandidato ug partidong politikal hangtud nga ngadto sa mga botante ug civil society, nga motampo sa malinawon ug respetadong elektoral nga proseso.
Sumala kaniya, sa pakigtambayayong sa tanan, ang siyudad makaseguro nga ang 2025 elections wala lang mabantayi apan tinuod nga repleksiyon sa kabubut-on sa katawhan, luwas sa kahadlok, pagpanghadlok, ug pagsanta. (David Ezra Francisquete)