5 kilos 'shabu' signit sa buy-bust sa Lanao
(Hulagway gikan PDEA-BAR)

5 kilos 'shabu' signit sa buy-bust sa Lanao

SINGKO kilos nga gibug-aton sa gidudahang shabu nga mibalor og P35 milyones ang nakuha sa otoridad sa gihimong buy-bust sa Lanao del Sur, Abril 8, 2024.

Dinakpan nga si Zacaria Jaji Nandang alyas Dats nga molupyo sa Barangay Bagua 2, Cotabato City mag-atubang og kasong kalapasan sa Republic Act 9165 o Comprehensive Dangerous Drug Act of 2002.

Gibutyag ni Philippine Drug Enforcement Agengy-Bangsamoro Autonomous Region (PDEA-BAR) Regional Director Cesario Gil Castro nga mihimo sila og buy-bust uban ang puwersa sa PDEA Lanao del Sur, Provincial Drug Enforcement Unit-15, Police Regional Office-BAR, Regional Highway Patrol Group, NBI, NICA ug 3rd Scout Ranger Battalion sa Barangay Matalin, Malabang, Lanao del Sur batok sa suspek.

Dugang pa nga dihang itunol na ni Nandang ang shabu sa posuer buyer, didto na siya gidakop.

Nakuhaan ang suspek og lima ka pakete sa gidudahang shabu nga mitimbang og lima kilo, mibalor og kapin P34 milyones.

Narekober sab ang P1 milyones boodle money nga gigamit nga buy-bust money, mga non-drug items.

Gidugang ni Castro nga dugay na nilang gipanid-an si Nandang nga nagpabalhin-balhin og lugar sa iyang transaksiyon.

Anaa na karon ang suspek sa prisuhan sa PDEA-BAR sa Cotabato City samtang gihuwat ang sunod nga mando sa korte nga pagbalhin kaniya sa Provincial Jail. (EEF)

SunStar Publishing Inc.
www.sunstar.com.ph