NAHULOG na sa mga kamot sa awtoridad ang tulo ka mga regional target sa drug watchlist sa Davao Region ug laing duha pa atol sa drug buy-bust operation sa mga sakop sa Digos City Police Station alas 6:07 sa gabii, Huwebes, Nobyembre 9, 2023 sa Purok Chico, Luna Gomez Street, Brgy. Zone 3, Digos City.
Giila ni Police Captain Diosdado Niosnes II ang mga dinakpan nga sila alyas Palaman, drug den maintainer ug ika-4 sa listahan; alyas Von, top 4 sa drug watchlist; alyas Jhon-Jhon, top 7; alyas Kel ug alyas Win.
Sumala ni Police Captain Niones, ang mga suspek napalitan og usa ka pakite sa gituohang shabu nga mokantidad og P1,000.
Nakuhaan sab sila sa ilang posisyon og laing siyam pa ka mga pakite, shabu paraphernalia ug usa ka cal. 38 homemade revolver.
Ang mga dinakpan gipasakaan og kasong paglapas sa Republic Act 9165 kun Comprehensive Dangerous Drugs Act of 2002.
Una niini, gibutyag sa Davao del Sur Provincial Police Office nga mas pakusgan pa nila ang pagmonitor sa mga tawo nga gituohang nalambigit sa ilegal nga druga.