NAGSUGOD kadugta na ang patay nga lawas sa usa ka 54-anyos nga babaye dihang napalgan kini sulod sa girentahan niyang lawak sa Purok 7, Barangay Ising, Carmen, Davao del Norte.
Ang biktima giila nga si Nora Almaden Lapiz, 54, minyo, nga nag-inusarang nagrenta sa boarding house nga gipanag-iyahan sa pamilyang Potenciano.
Suma pa nga mga alas dos sa hapon, Abril 9, si Ruth Potenciano nga silingan ra sab sa biktima nakamatikod sa laing baho ug daghang langaw nga naglupad-lupad duol sa gipuy-an ni Nora.
Gisampit ni Ruth ang silingan apan wa kini mitubag maong gitawgan ang anak sa biktima nga taga Purok 2A, Barangay Ising, Carmen.
Sa pag-abot sa anak, pugsanon nilang gisulod ang boarding house ug nakita ang biktima nga nagbuy-od sa salog, baho na ug padugta na ang lawas.
Sulti sa anak sa biktima nga naghambin sa sakit sa kasingkasing ug may breast cancer ang inahan.
Uwahi nga nakita ang biktima Abril 5, diin nakasulti pa kini nga naglain ang iyang lawas.
Patay nga lawas sa biktima gipahiluna na sa usa ka punerarya sa Tuganay, Carmen Davao del Norte. (Dexter T. Visitacion)