GENERAL SANTOS CITY -- Gibuhian sa Department of Environment and Natural Resources (DENR) - Community of Environment and Natural Resources Office (Cenro) ang 57 ka Olive Ridley nga pawikan nga bag-ong gipusa sa baybayon sa Barangay Burias, Glan Sarangani Province, Dominggo, Hunyo 15, 2025.
Ang pagbuhi sa mga pawikan gipahigayon sa Cenro-Glan sa duha ka giila nga nesting sites.
Kini subay sa hugot nga koordinasyon sa mga protected area rangers sa pagtubag dayon ug pagseguro sa luwas nga pagpagawas sa mga pawikan sa dagat ngadto sa ilang natural nga pinuy-anan.
Ang kalihokan gisaksihan ug gisuportahan usab sa mga personahe sa Sarangani Maritime Police Station ug Coast Guard Station Eastern Sarangani.
Ang Olive Ridley sea turtle giklasipikar nga usa ka threatened species ubos sa DENR Administrative Order No. 2019-09.
Kini kabahin sa Updated National List of Threatened Philippine Fauna and their Categories.
Gipanalipdan usab kini ubos sa Republic Act No. 9147, o ang Wildlife Resources Conservation and Protection Act nga nagmando sa pagkonserba ug pagpanalipod sa wildlife sa nasud ug sa ilang mga pinuy-anan. (Edgar E. Fuerzas)