6 angol pagbusikad sa granada

6 angol pagbusikad sa granada
Hulagway gikan sa Pikit Municipal Police Station

GILUTOS na karon sa mga awtoridad ang mga suspetsado nga miitsa'g granada alas 6:30 sa gabii, Sabado, Nobyembre 25, sa Pikit, probinsiya sa Cotabato.

Ang pagbusikad miangol og unom ka mga tawo nga sila si Rahid Buisan Alang, Esmail Abdul Abu, Ben Abdulkadir Matcher, Muhamad Guimbalangan Kalido, Tarmeji Silongan Kalido ug Mukindang Guiambangan Kalibo, mga molupyo sa Pikit.

Gibutyag ni Pikit Chief of Police, Major John Arvin Cambang, nga duha ka wala mailhing tawo ang miitsa'g granada sa Sitio Punol, Barangay Fort Pikit sa Pikit, Cotabato Province.

Abtik sab nga miikyas ang mga suspetsado sakay sa motorsiklo paingon sa Pagalungan, Maguindanao del Sur.

Mga naangol gisapupo sa ilang pamilya ug gidala sa Cruzado Medical Hospital ug giingong anaa sa talandugong kahimtang.

Atol sa pagresponde sa mga pulis, sundalo ug Explosive Ordnance Disposal Team (EODT) ilang narekober mga tipaka sa granada.

Kahinumdoman nga sunod-sunod ang pagpanglabay og granada sa Pikit diin kining ulahing hitabo giingong mas grabe gumikan kay unom ka tawo ang nasamdan.

Sa kasamtangan, kapulisan sa Pikit Municipal Police Station padayon nga nilusad og dugang imbestigasyon sa hitabo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph