MAS abtik karon ang mga kapulisan sa Davao City human madakpan ang unom ka mga tawo sa managlahing buy-bust operations nga gihimo sa lahi-lahi nga Police Stations sa siyudad, Agosto 5 ug 6, 2025.
Unang nasikop mao ang suspek nga si Ahmen, 34-anyos, minyo, ug residente sa Purok 2-A, Isla Verde, Brgy. 23-C, Davao City sa operasyon sa Sta. Ana Police Station (PS1) alas 2:30 sa kaadlawon sa Purok 4-E, Isla Verde.
Nasakpan ang suspek sa mga barangay tanod nga nagronda sa dapit ug nakit-an nga nilabay og gamay nga plastik nga sudlanan nga may sulod nga gituohang shabu. Ang nakuha nga druga adunay standard drug price nga P8,840.
Ikaduha, gironda usab sa PS5 Buhangin ang usa ka balay sa Barangay 17-B, Bo. Obrero nga gipuy-an ni alyas Glycerine ug niresulta sa pagkadakop sa tulo ka suspek nga sila alyas Mac Mac, 50-anyos, taga Lanang, alyas Arman, 50-anyos, taga Bucana ug si Glycerin, 26-anyos, tag-iya sa balay usa ka Barista.
Gikumpiskar sa kapulisan ang upat ka pakite nga dunay sulod nga gituohang shabu nga nagkantidad og P25,220, mga cellphone, ug buy-bust money.
Ang operasyon gihimo uban sa Philippine Drug Enforcement Agency (PDEA) ug gipangulohan sa Buhangin Police Station ubos ni Police Major Clarian Dave S. Toboso, ang station commander.
Sa laing bahin, alas 10:24 sa gabii sa Agosto 5, nadakpan sa San Pedro Police Station (PS2) si alyas Bryan, 26-anyos, taga Barangay 31-D, Davao City, sa gihimo nga buy-bust sa Purok 2, Barangay 76-A, Bucana.
Nasakmit gikan kaniya ang unom ka pakite nga dunay gituohang shabu nga may kantidad nga Php 32,640, usa ka coin purse, personal cash, iPhone, ug buy-bust money. Gihimo ang operasyon uban ang koordinasyon sa PDEA.
Sa Calinan, alas 7:40 sa gabii sa parehas nga adlaw, nasikop sa PS10 Calinan si alyas Cris, 30-anyos, giilang Top 7 City-Level High-Value Target (HVI).
Ang operasyon gihimo sa Ramon Magsaysay Street, Barangay Calinan Poblacion, diin nakuha gikan sa suspek ang usa ka dako nga pakite sa gituohang shabu dunay gibanabana nga kantidad nga P35,360, buy-bust money, ug usa ka cellphone.
Ang tanang mga nadakpan gikuhaan og mga constitutional rights sa pinulongan nga ilang nasabtan. Ang mga ebidensiya gilista ug gitagana na alang sa legal nga proseso.
Kasong paglapas sa RA 9165 kon Comprehensive Dangerous Drug Act of 2002 ang ipasaka batok kanila didto sa korte. (Jeepy P. Compio)