UNOM ka tawo ang namatay gikan Barangay San Vicente, Makilala, North Cotabato tungod sa tumang kainit, ug nakasinati sa heat stroke.
Matud ni San Vicente Barangay Kapitan Rey Gabia nga 21-anyos ang pinakabata nga namatay.
Unang namatay ang usa ka barangay health worker.
Misunod dinhi ang buko juice vendor nga kalit nawad-an og panimuot, gideklara nga dead on arrival sa mga doktor sa pag-abot sa ospital.
Laing 45-anyos nga mag-uuma sab ang namatay, dayon dugang tulo pa nga nakabsan sab sa kinabuhi tungod sa tumang kainit sa temperatura karon.
Sa 5-day computed and 2-day forecast sa Heat Index sa Mindanao, naabot sa 42 degree celcius ang heat index sa Bangsamoro Autonomous Region.
Ang Department of Health (DOH) nagpasidaan kontra sa mga heat-related illnesses nga mamahimong moguwa tungod sa tumang kainit sa panahon.
Ang taas nga temperatura moresulta sa heat cramps ug heat exhaustion, diin mga simtomas mao ang kakapoy, kalipong, sakit sa ulo, pasguka ug pagkalipong.
Dugang nga exposure sa kainit moresulta sa heat stroke, usa ka seryosong kondisyon nga moresulta sa pagkawala sa panimuot, kalibog o seizures nga makamatay kung di matagad.
Sa pagkakaron, gimanduan na sa barangay local government unit ang mga barangay health worker nga regular nga i-tsekup ang mga molupyo nga taas ang dugo uban ang pagmaymay sa angay nilang himuon aron maalibyuhan ang kainit nga gibati. (Edgardo E. Fuerzas)