68,000 pamilya apektado sa baha

COTABATO CITY -- Misaka na sa 17 ka lungsod sa Maguindanao del Sur ang lubog sa baha tungod sa pag-awas sa Rio Grande de Mindanao, Liguasan Marsh ug Pulangi river.

Kini ang gikompirma ni Provincial Disaster Risk Reducation and Management Office Head Ameer Jehad 'Tim' Ambolodto sa Maguindanao del Sur.

Matud ni Ambolodto nga sa 24 ka lungsod sa probinsiya, 17 ang grabeng naapektuhan sa baha.

Kini naglakip sa Pagalungan, Datu Montawal, Datu Piang, GSKP, Datu Abdullah Sangki, Datu Salibo, Mamasapano, Sultan Sa Barongis, Shariff Saydona Mustapha, Ampatuan, Datu Unsay, Datu Saudi Ampatuan, Shariff Aguak, Rajah Buayan, Datu Anggal Midtimbang, Latlat, ug Pandag.

Gidugang ni Ambolodto nga 68,553 ka pamilya na ang apektado sa baha ug kasamtangang gibakwit sa luwas nga mga lugar.

Samtang nagpadayon ang pag-apud-apod og mga hinabang sa gobyerno sa mga apektadong pamilya sa mga nahisgutang mga lungsod.

Sa pikas bahin, gihunong na ang retrieval operations nga gilusad sa Maguindanao del Norte human nakit-an na ang patay'ng lawas sa bata nga gianod sa baha alas 10:00 sa buntag, Dominggo, Hulyo 14, 2024.

Kini mismo ang gipahibawo ni PDRRMO Head Nashrullah Imam.

Matud niya, gihunong na ang Search, Rescue and Retrieval o SRR Operation sa tibuok probinsiya human napalgan ang patayng lawas sa ikaupat nga bata nga nawala human naanod sa baha.

Kini mao si Naslia Usmeña, 4-anyos nga taga Campo Uno, Barangay Bugasan Sur, Matanog.

Kahinumdoman nga niadtong Miyerkules sa miaging semana gianod sa baha ang kabalayan sa Campo Uno diin lakip nga nadala mao ang magsuong Norhaina, 11, Norhainie, 3-anyos ug Rasul, 7-anyos.

Unang nakit-an sila si Norhaina ug Norhainie ug nagsunod ang lawas ni Rasul. Ug ning ulahi nakit-an ang patay nga lawas ni Usmeña. (EEF)