PITO ka mga sakop sa Dawlah Islamiyah terror group ang ni-surrender ngadto sa militar sa kabukiran sa North Upi, Maguindanao del Norte alas 2:00 sa hapon, Miyerkules, Hunyo 4, 2025.
Gibutyag ni 6th Infantry (Kampilan) Division Chief ug Joint Task Force Central Commander Major General Donald Gumiran nga ang mga nahisgutang lokal nga terorista niuyon mopahawa sa kalihukan pinaagi sa back channel nga paningkamot sa lokal nga ehekutibo ug mga opisyal sa 57th Infantry Battalion ug 603rd Infantry Brigade.
Una nang ni-surrender ang pito ka terorista ngadto kang Lieutenant Colonel Aeron T. Gumabao, commanding officer sa 57th IB.
Nisaad ang mga nahisgutan nga mosalig sa gobyerno atubangan nila Brigadier General Michael A. Santos, commander sa 603rd Infantry Brigade, Upi Mayor Rona P. Flores, Maguindanao del Norte Gov. Sharifudin Tucao P. Mastura, ug uban pang mga representante gikan sa Bangsamoro government.
“We are grateful to all who cooperated in convincing them to return to the fold of law and thrive in peace in their barangays,”pagpadayag ni Gen. Gumiran.
Mga terorista sa Dawlah Islamiya ug Bangsamoro Islamic Freedom Fighters (BIFF) gilambigit sa pagpamomba sa Central Mindanao sukad niadtong 2014 nga nikalas ug niangol na og daghang kinabuhi.
Kapin sa 800 ka miyembro sa duha ka grupo ang nakabenepisyo sa 6th ID’s regional reconciliation program sa ekstremista sa milabay nga tulo ka tuig, kon diin tanan sila nibalik sa sabakan sa balaod uban sa tabang sa mga local government units (LGUs) ug mga ahensiya sa Bangsamoro Autonomous Region in Muslim Mindanao (Barmm). (Edgar E. Fuerzas)