DAVAO DEL SUR — Ang amahan nga taga Magsaysay, Davao del Sur nga bag-o lang mipatay sa iyang kaugalingong pito ka buwan nga bata aduna nay kasaysayan sa samang kaso human gipatay ang iyang kamagulangan, usa ka tuig nga bata niadtong 2019, kini ang gikumpirma sa Magsaysay Municipal Police Station, Pebrero 12, 2024.
Sa imbestigasyon nga gihimo sa kapulisan, ang suspek nga giilang si Angelo Malit, 25-anyos, residente sa Datal Lanao, Purok 8, Barangay Tagaytay sa maong lungsod maoy mipatay sa iyang anak pinaagi sa paglabay sa bata kinsa naigo ang ulo sa hagdanan nga maoy hinungdan sa hinanaling kamatayon niin niadtong Sabado sa gabii, Pebrero 10.
Sa laing bahin, base sa pamahayag sa live-in-partner sa suspek nga si Sheryl Bulahing, nangayo kini og pabor sa iyang bana nga pahigdaon ang ilang anak sa duyan sanglit sila ang iyang iyaan nga nakakita usab sa nasangpit nga hitabo. okupado sa paggaling og kape.
"Pagsaka nako sa taas, gipatutoy nako ang bata, pagtulog sa bata, ninaog napud ko para tabangan nako akoang ante, wala pa mi nahuman sa pagtapok, wala na gyud niabot sa usa ka minuto, nahitabo na. Diha s’ya nilabay sa bata sa atubangan [namo],” saysay sa kapuyo.
Human sa hitabo, gilayong misibat ang responsable nga amahan kinsa alas 3 sa hapon, Dominggo nadakpan ang suspek didto utlanan sa Tulunan, Cotabato ug Magsaysay Davao del Sur.
Sa laing bahin, sa pakighinabi sa radyo kang Sheryl, gibutyag niini nga namatay sa tambalanan ang ilang unang anak tulo ka semana human gikulata sa iyang bana ang ilang kamaguwangan apan wala madakpi sa mga awtoridad ug opisyal sa ilang lugar.
Nadiskubre sab nga niadtong tuig 2019 napatay sab sa suspek ang iyang usa ka tuig nga anak nga gipuspos sa punuan sa lubi didto sa Barangay Bacung Tulunan, North Cotabato.
Sa kasamtangan nagtingkagol ang suspek sa prisohan sa kapulisan sa Magsaysay Davao del Sur ug gihulat ang tukmang kaso nga isang-at sa korte. (Uban sa taho ni Edgar E. Fuerzas)