GIKOMPIRMA ni Southern Philippines Medical Center (SPMC) chief Dr. Ricard Audan sa Habi at Kape Media Forum, Miyerkules, Hunyo 4, 2025, nga pito sa 11 ka indibiduwal kinsa nagpositibo sa Human Immunodeficiency Virus (HIV) nasayran lakip sab sa nakompirmang mga kaso sa Monkeypox (mpox) sa Davao Region, kon diin kadaghanang mga kaso mga lalaki.
Butyag niya nga ang nahabiling upat nga HIV-positive nga indibiduwal wala magpositibo sa mpox.
Gitin-aw ni Dr. Audan nga ang paagi sa transmisyon di pa masulti apan posibleng nalambigit kini sa "high-risk" nilang aktibidad.
“Hindi natin masasabi kung ano yung transmission talaga but possibly because of their activities," pasabot ni Dr. Audan ug dugang nagkanayon nga ang inpeksiyon sa sakit nikatag pinaagi sa close contact sa nataptan nga tawo, lakip ang paggunit, paghalok, seks, o face-to-face nga inter-aksiyon.
Sa dihang gipangutana sa mga tigbalita sa Davao bahin sa kasamtangang mga kaso sa mpox sa rehiyon, gipahayag ni Dr. Audan nga sa 14 ka natalang mga kaso, pito niini nakompirma nga nagpositibo ang tanan kinsa mao sab ang nagpositibo sa HIV.
Sa maong ihap, upat niini kasamtangang gitambalan sa SPMC isolation facility, usa ang namatay, usa nakarekober, ug usa nagpositibo na sab tungod sa close contact exposure.
Iyang gitin-aw nga way usa sa mga indibiduwal dunay kasaysayan sa pagbiyahe, pinagi sa pag-ingon, “Wala talagang travel history but because there are HIV patients na you may mga sexual activity na hindi natin alam but I do not want to [offend] but yung sexual activity… sino-sino ang na-meet nila.”
Samtang gitaho ni Dr. Sofia Corazon Zafra, Emerging and Re-emerging Infectious Diseases program manager sa City Health Office (CHO), atol sa 21st regular session niadtong Martes nga tunga-tunga sa Enero 1 ug Hunyo 2 sa 49 nga close contacts nga natumbok, 35 niini nakompleto na sa gikinahanglan nga 21-adlaw nga monitoring period nga wala magdebelop og bisan unsang sintomas.
Sumala sa World Health Organization (WHO), mga tawo nga dunay daghang mga sexual partners maoy dunay taas nga risgo sa pagbaton og mpox.
Mga indibiduwal nga dunay mpox makatakod sa kagaw ngadto sa uban hangtud nga di pa maayo ang ilang mga samad ug makaporma na ang panit.
Sa ubang mga kaso, mga tawo mahimong mataptan nga di mopakita og bisan unsang sintomas.
Samtang dunay mga taho sab og "asymptomatic transmission," kung paunsa kini mahitabo, wala kini masabti.
Dunay mga grupo sa kabataan, mabdos, ug kadtong hinay og immune systems, sama sa mga tawo nga nabuhi sa di kontrol nga HIV maoy naay taas nga risgo sa severe illness o pagkamatay gikan sa mga komplikasyon nga dunay kalambigitan sa mpox.
Kasamtangan, ang ihap sa mga batan-ong Pilipino nga nadayagnos nga HIV nisulbong ngadto sa 500 porsiyento, hinungdan nga ang Department of Health (DOH) nanawagan nga HIV ideklara nga national public health emergency.
Sa Davao City, gitaho sa Reproductive Health and Wellness Center (RHWC) ang 117 ka mga kaso sa HIV sukad Mayo 2025, ang ihap nga hapit susama niadtong 2024.
Gitin-aw ni Karla Mae Sepulveda-Edjic, nars sa RHWC, nga sukad Enero 2025, ang DOH nagtaho og 55 lang nga nakompirma nga mga kaso sa HIV gikan sa treatment hubs sulod sa Davao City.
Iyang gi-esplikar nga kini nga ihap nagpakita lang sa nakompirma nga mga kaso nga nalambigit ang molupyo sa dakbayan. Ang datus sa RHWC naglakip sa tanang mga indibiduwal kinsa dunay "accessed" sa ilang serbisyo, apil kadtong gikan sa gawas sa Davao City. (David Ezra Francisquete)