NAGPAGAWAS ang Regional Trial Court (RTC) Branch 11 og 72 oras nga Temporary Restraining Order (TRO) pinetsahan og Mayo 24, 2025, aron nga ihunong ang demolisyon sa Barangay Matina Crossing, 74-A, Davao City.
Kini nga katikaran naghanyag og temporaryong alibyo ngadto sa gatusan ka mga molupyo kay ang korte magpadayon sa pagdungog alang sa posibleng Preliminary Injunction.
Ang TRO niabot usa ka adlaw human ang nahitabo ang operasyon sa demolisyon niadtong Mayo 23 nga nakadislokar og gibanabana nga 400 ka pamilya ug nagguba sa mga 80 ka mga balay sa Upper ug Center Arroyo, Matina Crossing.
Ang demolisyon gihimo ubos sa Special Writ of Demolition nga gipagawas sa korte.
Ang operasyon nagsugod sayo sa buntag niadtong Biyernes kon diin dunay gilusad nga "pre-deployment" gikan sa Talomo Police Station. Ang sesyon gipangulohan ni PS3 Commander Major Genesis P. Oriel ug ang area supervisor Captain Ryan Kenneth T. Ramones.
Sumala ni Davao City Police Office (DCPO) spokesperson Captain Hazel Caballero, kinatibuk-ang 300 pulis ug 500 ka mga tawo nga maoy mohimo sa demolisyon sa lugar, nga dunay gilapdon nga tulo ka ektarya.
Gipahimug-atan sa mga awtoridad ang "maximum tolerance, strict adherence to rules of engagement, and maintaining peace and order" sa tibuok operasyon.
Gituki sab ang "safety protocols and coordination" nga mga estratihiya aron pagseguro ang hapsay nga paghimo niini.
Bisan pa sa maong paningkamot, kalibog ug pagkadismaya ang nikuyanap sa mga molupyo sa Arroyo Compound.
Daghang mga nanimuyo nag-alegar nga ang ilang mga balay dili kabahin sa mando nga idemolis.
Ang purok leader nagpadayag sa iyang kahigawad kay duna lay pito ka mga balay ang nalista nga i-demolis, halos tanang mga estraktura sa compound ang giapil, apil ang iyang balay, nga wala sa listahan.
Sa pikas bahin, gibutyag ni Barangay Matina Crossing Captain Joel Santes nga gipahibawo lang siya bahin sa mando sa demolisyon usa ka adlaw una kini gihimo.
Iyang giangkon nga wa di siya segurado bahin sa aboton sa mando, ilabi na bahin sa asa nga upat ka titulo sa mga yuta sa compound ang malakip.
Gitambagan sa opisyal ang naapektuhan nga mga molupyo nga ikonsidera ang pagsang-at og legal nga aksiyon batok sa mga nalambigit sa demolisyon.
Kasamtangan, nilihok na ang City Social Welfare and Development Office (CSWDO) aron nga abagan ang nadislokar nga mga pamilya.
Pagsusi ug paglista sa apektado nga mga indibiduwal nagsugod buntag niadtong Sabado sa Justiniani Gym sa Matina Crossing.
Gipadala sab sa CSWDO ang ilang mobile kitchens ug nag-apud-apod og food packs aron suportgahan ang mga pamilya nga nadislokar gikan sa compound nga gipanag-iya sa pribado.
Samtang mga opisyale sa barangay nihangop sa TRO isip importanteng lakang sa pagpanalipod sa mga katungod sa ilang konstituwente.
"We continue to work tirelessly to ensure the welfare and secure the future of our displaced families. We urge everyone to remain calm and cooperate with the legal process," pahayag sa liderato sa Barangay Matina Crossing. (David Ezra Francisquete)