75K pasahero sa mga terminal sa Davao modagsa

GILAUMAN sa Davao City Overland Transport Terminal (DCOTT) nga modagsa ang 75,000 pasahero alang sa selebrasyon sa ika-39th Kadayawan Festival sa Davao City.

Gisulti ni Aisa Usop, manager sa DCOTT, atol sa paghinabi kaniya sa GMA Super Radyo Davao niadtong Biyernes, Agosto 2, 2024, nga gilauman nila ang pagdagsa sa 75,000 ka pasahero sa tibuok panahon sa Kadayawan Festival sa dakbayan. Kini nga ihap mas taas itandi sa kasagarang pasahero matag adlaw nga naa sa 35,000 hangtud 40,000.

“Namatikdan na nato ang pag-increase sa atoang mga pasahero nga nagasulod or manukad diri sa atoang Davao City Overland Transport Terminal aron sa pagsakay sa moabutay nga mogikan sa mga kasigpit nga mga provinces,” butyag niya.

Uban sa pagdaghan sa mga pasahero, gihisgutan ni Usop nga ang ihap sa mga biyahe sa terminal modaghan sab og 1,000 hangtud sa 1,500 bus trips matag adlaw, itandi sa regular nga 700 hangtud 800 ka biyahe.

Dugang pa niya nga nakig-alayon na sila sa Land Transportation Office-Davao Region (LTO-Davao) aron nga mo-isyu og permiso ngadto sa mga bus operators kun ugaling dunay dugang mga bus ang gikinahanglan.

Nakig-koordinar na sab ang DCOTT sa lokal nga panggamhanan sa Davao alang sa dugang personahe nga madestino sa terminal, kay nagpadayon ang renobasyon ug ang baggage x-ray machine di pa magamit.

Kahinumdoman nga gikanayon ni Davao City Tourism Operations Office (DCTOO) officer-in-charge Jennifer Romero atol sa ISpeak Forum: Kadayawan 2024 MediaCon niadtong Hulyo 25, 2024, sa Rogen Inn, nga tumong nila ang pagdani og dugang mga domestic tourists, subay sa mando ni Davao City Mayor Sebastian “Baste” Duterte. Ilang gitutokan sa ilang paningkamot ang mga kasikbit nga mga siyudad. Gilauman niya nga mga 200,000 ngadto sa 250,000 ka mga lokal ug internasyonal nga turista alang sa Kadayawan Festival. (RGP)