GIKOMPIRMA sa Davao City Police Office (DCPO) nga mipanaw na tungod sa grabeng pagka-angol ang babayeng senior citizen nga nabanggaan sa Montero Sport pasado alas 3:00 sa hapon, Hunyo 2, 2025, sa Daang Maharlika Highway, Barangay Vicente Hizon Sr., siyudad sa Davao.
Ang biktima nailhan nga si Petra (bansagon gitago) nga taga Barangay Vicente Hizon Sr. ning dakbayan, samtang ang nakabangga nga Montero Sport, gimaneho ni alyas Joy, 32 anyos, nga taga-Apokon, Tagum City, Davao del Norte.
Matud sa imbestigasyon sa kapulisan, nitabok ang biktima sa pedestrian lane sa maong lugar.
Gipalabay siya sa ubang mga behikulo apan pag-abot sa innermost lane, nabundolan siya sa sakyanan ni alyas Joy nga niresulta sa iyang pagkatumba.
Mga nakasaksi una nang nagbutyag nga naparok ang ulo sa biktima rason nga "unresponsive" siya dihang naabot ang mga responders nga maoy nihatud kaniya sa balay-tambalanan.
Ang drayber sa nakabangga nga sakyanan gikustodiya sa kapulisan samtang ang pag-umangkon sa biktima nga si alyas Apple, nipatim-aw sa mga awtoridad, Hunyo 2, aron nga kuhaon ang mga personal nga gamit sa biktima. Gibutyag sa pag-umangkon nga biyuda na ang biktima ug anaa sa gawas sa siyudad sa Davao ang uban niyang mga igsuon.
Kagahapong adlawa, Hunyo 3, human nga makompirma ang kamatayon sa biktima, ang kabanay sa senior citizen nagbutyag sa kapulisan nga mopasaka sila og kasong Reckless Imprudence resulting in homicide ngadto kang alyas Joy. (July Aubrey R. Ngo)