GIHIKAY na sa National Bureau of Investigation Southeastern Mindanao Regional Office (NBI) Davao ang kaso nga ipasaka batok sa walo ka mga Chinese nationals diin sila nakatakdang ipang-deport padung sa ilang nasud human sa disposasyon sa ilang kaso sa Pilipinas.
Kini human nga gironda sa NBI- Davao ang duha ka andana nga balay sa usa ka subdivision sa Diversion Road sa Buhangin, Davao City Martes sa gabii, Agosto 12, 2025.
Giingon ni NBI-Davao director Atty. Arcelito Albao nga nakadawat sila og reklamo gikan sa homeowners association batok sa kabanha sa mga tawo sud sa maong balay labi na sa dis-oras sa kagabhion.
“Reklamo ng mga kapitbahay na ito daw’ng mga Chinese Nationals kapag nalalasing maiingay, sumisigaw, minsan may mga nag-aaway,” ingon ni Atty. Albao.
Dali dayong mihimo og plano ang NBI-Davao alang sa usa ka lehitimong pag-ronda diin nadiskubre nga gihimong Pogo hub ang nasampit nga balay nga gidumala sa mga Chinese nationals.
“We confirmed that this is a Pogo hub, or a Pogo operation,” ingon ni Atty. Albao.
Giingon ni Atty. Albao nga duha kini ka andana nga balay diin ang ubos nga bahin gihimo nilang kan-anan samtang ang ikaduhang andana mao ang opisina sa operasyon diin asa dunay daghang mga computers.
Sa kasamtangan temporaryong gikustodiya ang mga nahisgutang langyaw sa buhatan sa NBI-Davao ug giandam na ang mga papeles sa pagpa-deport kanila padung sa ilang nasud. (Jeepy P. Compio)