COTABATO CITY -- Walo ka mga indibiduwal sa Bangsamoro Autonomous Region in Muslim Mindanao (Barmm) nga nataptan og mpox naayo na.
Kini ang gikompirma ni Ministry of Health-(MOH-Barmm) Minister Dr. Kadil “Jojo” Sinolinding.
Higpit nga gimonitor sa MOH-Barmm ang 37 ka mga tawo nga gidudahang nataptan sa sakit nga Monkeypox.
Ang mga sample sa dugo gipadala na sa Research Institute for Tropical Medicine alang sa eksaminasyon aron mahibal-an kung sila tinuod nga nasakit sa mpox.
Ang walo ka mga pasyente nga giigo sa kagaw, upat niini taga Cotabato City ug ang uban sa lain-laing mga lungsod sa probinsiya sa Maguindanao del Norte.
Nagpadala sab ang MOH-Barmm og mga rasyon sa pagkaon, suplemento sa bitamina, ug uban pang kinahanglanon samtang anaa ang mga biktima sa isolation facility.
Gikanayon ni Dr. Sinolinding nga ilang pakusgan pa ang information campaign sa paglikay sa mpox.
Gihingusgan karon sa Barmm ang mga sumbanan batok sa mpox nga gipatuman sa mga tugpahanan ug pantalan sa rehiyon. (Edgar E. Fuerzas)