USA ka 80-anyos nga babaye ang namatay human nabanggaan sa motorsiklo nga gimaneho sa menor de edad nga lalaki sa Purok 8, Upper Piedad, Barangay Bato, Toril, Davao City alas 2:30 sa hapon, Hunyo 11, 2025.
Una niini, gipahibalo ang buhatan sa kapulisan diin gilayong gi-dispatch si Police Staff Sergeant Graham Stephen Arcenas, duty traffic investigator, aron imbestigahan ang nahitabong aksidente.
Sakay sa Mobile Patrol 37, mitungas si Arcenas sa lugar sa insidente diin nasuta nga ang hitabo gikalambigit sa sakyanan nga usa ka XR 200 nga motorsiklo nga adunay plaka nga 2733LH, ug kini gimaneho sa 14-anyos nga lalaki nga residente sa Purok 1B, Luak, Barangay Bayabas, Toril.
Ang biktima nailhan nga si Glaceria Español Inao, 80-anyos, usa ka lumolupyo sa Purok 8, Upper Piedad, Barangay Bato, Toril.
Sumala sa inisyal nga imbestigasyon, ang motorsiklo nagdagan padulong sa Lantaw Banod dihang naabtan niini ang tigulang nga babaye nga nagtabok sa karsada.
Tungod sa kakusog, nabanggaan ang biktima, napalid ug nabagnos sa semento nga kalsada, hinungdan sa samad sa daghang parte sa iyang lawas.
Gidali dayon pagsalbar 911 ambulance ang biktima padulong sa Southern Philippines Medical Center (SPMC), apan gideklarar kini nga patay na sa doktor nga si Dr. Roy Macapas.
Padayon pa ang imbestigasyon sa kapulisan bahin sa insidente samtang ang menor de edad gi-rescue sa Women and Children’s Protection Desk (WCPD) sa Toril PNP. (Jeepy P. Compio)