GIPANGITA na karon sa otoridad ang suspetsado nga milugos sa 9-anyos nga batang babaye alas 3 sa kadlawon, Martes, April 9 sa General Santos City.
Ang biktima ginganlan nga si alyas Joy, taga Barangay Tambler, General Santos City.
Sa asoy sa ginikanan ngadto sa kapulisan sa Gensan, wa gyud sila kabantay nga may misulod na diay nga tawo sa ilang balay, nga maoy miaswat sa ilang anak, ug gidala gawas sa balay.
Suma sa ginikanan nga nahinanok kaayo sila sa pagkatulog ug wa kabantay nga may dautang tawo na diay nga mihasol kanila.
Saysay sa 9-anyos nga biktima nga nakamata na lang siyang anaa siya sa kasagbutan uban ang suspek.
Dugang sa bata nga gitionan siya'g screwdriver sa suspek dungan sa pagbahad nga dunggabon siya og mosinggit.
Human nagmalampuson ang suspek sa iyang tumong, mibiya kini samtang ang bata naghilak nga nagpakitabang sa iyang ginikanan.
Sa kasamtangan gihulat nalang sa kapulisan ang resulta sa mediko legal sa biktima, uban ang imbestigasyon sa hitabo. (Edgardo E. Fuezas)