9 centenarians nakadawat tag-P100,000

9 centenarians nakadawat tag-P100,000
Hulagway gikan sa City Social Welfare and Development Office (CSWDO) sa Davao

ANG City Social Welfare and Development Office (CSWDO) mihatag sa siyam ka Dabawenyo centenarians sa ilang cash grants nga nagkantidad og P100,000 gikan Hunyo 18 hangtud 21, 2024.

Si Julie Dayaday, CSWDO Head, niingon sa phone interview sa SunStar Davao niadtong Dominggo sa buntag, Hunyo 23, 2024, nga ilang gihatag ang P100,000 nga kantidad sa cash grants sa siyam ka Dabawenyo nga centenarians sa siyudad pinaagi sa house-to-house distribution.

Ang mga centenarians mao sila si Ching Siong Uy, Catalina Naraval, Felisa Deligencia, Lilian Carriedo, Elizabeth Guerzon, Josefina Sereno, Ulpiana Dalumpines, Panadem Macatondog, ug Rosario Aglipa.

Dugang ni Dayaday nga gawas sa cash incentives, gihatagan usab og plake ang mga centenarians ug nipadayag nga ang siyam maoy unang batch ug aduna pay laing batch.

Gipasabot sa CSWDO head nga ilang gipili ang house-to-house distribution sukad niadtong 2022, atol sa paglusad sa cash incentives alang sa centenarians, daghan kanila ang nakasinati og stress tungod sa oras sa pagbiyahe. Sa pagkonsiderar nga ang uban naghigda o nag-wheelchair, ang pagduaw kanila sa balay napamatud-ang haum nga alternatibo.

Sa 2022, anaa sa 20 ka centenarians ang nahatagan, ug sa 2023, laing 20 usab ang gigantihan. Hangtud sa Hunyo 2024, si Dayaday miingon nga mohatag sila og cash grants ngadto sa gibana-bana nga 13 pa ka centenarians.

Gitataw ni Dayaday nga ilang gi-cross check ang edad sa mga centenarian nga walay saktong dokumento pinaagi sa birth certificates sa ilang mga anak.

Bisan pa man nga nitaliwan na ang pipila sa mga centenarians, ang buhatan naghatag gihapon og pag-ila ug pasidungog sa ilang mga pamilya.

Pipila sa mga kinahanglanon alang sa mga centenarians nga gustong mo-avail sa mga awards naglakip sa pagsumite sa mosunod ngadto sa CSWDO District Office diin sila nahisakop: birth certificate, Office for Senior Citizens Affairs (OSCA) ID, ug alang niadtong walay birth certificate, bisan unsang balido nga dokumento nga nagpamatuod sa edad sa centenarian o sa birth certificate sa ilang anak.

Gawas sa budget sa CSWDO, ang DSWD-Davao sab mohatag og P100,000 sa mga centenarian sa rehiyon. Matud pa ni Dayaday nga pinaagi sa grant gikan sa DSWD-Davao ug sa CSWDO, ang mga centenarian sa siyudad makadawat og mokabat sa P200,000 nga cash grants gikan sa gobyerno. (Rojean Grace G. Patumbon)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph