GENERAL SANTOS CITY -- Walo ka mga Chinese nationals samtang usa ka Hong Kong national ang nasikop atol sa gipahigayong Joint Law Enforcement Support Operation (LESO) sa Helen Grace S. Camsa Precious Metal Mining Company sa Sitio Mangas, Barangay Chua, Bagumbayan, Sultan Kudarat Province, adlaw nga Sabado, Abril 19, 2025.
Mga langyaw nasuta nga nakalapas sa Section 37(a)(7) sa Philippine Immigration Act kun Working Without the Proper Work Visa/Permit or Undocumented Status ug Section 45(F) kun Misrepresentation.
Subay sa Mission Order nga gipagawas sa Bureau of Immigration, ang operasyon hiniusang gihimo sa Bureau of Immigration,Regional Intelligence and Operations Unit XI, 7th Infantry Battalion, Intel Units sa Armed Forces of the Philippines (AFP), ug Bagumbayan Municipal Police Station (MPS) nga gihatagan og awtorisadong aksiyon batok sa mga undocumented Chinese nationals nga nasuta nga ilegal nga nagtrabaho sa konstruksiyon nga walay mining permit processing plant.
Sumala kang Lieutenant Colonel Tristan Vallescas sa 7th IB nga ang ilang puwersa mihatag og suporta sa operasyon nga gitumong sa pagpreserbar sa lagda sa balaod ug pagseguro nga ang tanang langyaw nga nagpuyo o nagtrabaho sa nasud hingpit nga nagsunod sa mga balaod sa Pilipinas.
Sa laing bahin, si Brigadier General Michael A Santos PA, Commander sa 603rd Infantry (Persuader) Brigade, midayeg sa tropa sa 7th Infantry (TAPAT) Battalion, uban sa tanang participating law enforcement agencies sa malampusong pagdakop sa mga Chinese ug Hong Kong nationals nga nakit-an nga ilegal nga nagtrabaho sa minahan.
Gidayeg niya ang ilang propesyonalismo, koordinasyon, ug paspas nga pagpatuman sa operasyon, nga miresulta sa epektibo nga pagpatuman sa mga balaod sa imigrasyon ug pagpanalipod sa nasudnong interes.
Gihatagan pa niya og gibug-aton ang kamahinungdanon sa pagpabiling mabinantayon batok sa mga ilegal nga buhat sa pamuo nga makakompromiso sa nasudnon nga seguridad ug mapahimuslan ang lokal nga kahinguhaan.
Gidala ang mga dinakpan sa BI-RIOU XI sa Davao City alang sa dugang dokumentasyon ug disposisyon. (Edgar E. Fuerzas)