NAGPADAYAG og kabalaka ang Archdiocesan Commission on Elections Monitoring Parish Pastoral Council for Responsible Voting (ACE-COM PPCRV) bahin sa operasyon sa Automated Counting Machine (ACM) atol sa ilang Final Testing and Sealing.
Gikanayon ni Atty. Aileen Lizada, tigpamaba sa ACE-COM PPCRV, nga nakasugat siya og mga isyu samtang nisulay og boto atol sa final testing ug sealing sa ACM.
Gipaambit niya nga nag-"shade" siya og duha ka numero, nga wa gibasa sa ACM. Apan sa dihang nibotar siya og 13 ka mga kandidato, gibasa gihapon sa makina ug nirehistro og 12 ka pangalan.
“Sino ngayon yung magde-decide kung 13 gawin 12, sino magde-decide sino ang hindi kasama sa 12,” pangutana niya atol sa paghinabi sa mga tigbalita, Martes sa buntag, Mayo 6, 2025, sa Davao City National High School.
Gi-esplikar ni Lizada nga gituyo niya nga mobotar og sobra sa 12 ka mga senador atubangan sa uban pa aron nga sulayan kung ang makina makamatikod ba og "overvote."
Iyang gimarkahan ang balota og nagkadaiyang paagi -- gamit ang kahon, dayagonal nga linya, tuldok, bituon, ug pasobraan og shade -- aron nga sulayan kung unsaon pagtubag sa makina sa nagkadaiyang estilo sa marka.
Iyang gitin-aw nga kini nga mga marka gigamit lang sa tumong nga masulayan ang makina.
Gitaho sab niini nga mga pangalan nga gi-shade sa mga botante sakto nga gibasa sa makina. Sumala sa mga taho gikan sa ilang mga miyembro, mga ACMs tarong nga nitrabaho.
Dugang pa niya nga ang isyu nataho na ug iduso ngadto sa Commission on Elections (Comelec).
Tungod sa insidente, nitambag ang PPCRV ngadto sa mga botante nga segurohon nga tama ang pag-shade nila sa mga lingin ug likayan ang paggamit og bisan unsang mga marka aron nga ang ilang boto basahon sa ACM.
Samtang giklaro ni Commission on Elections-Davao Region (Comelec-Davao) Director Gay Enumerables nga ang numero “32” marka lang ug dili balido nga boto.
Gi-esplikar niini nga ang kuwadrado nga gigamit gawas sa lingin.
“Hindi natamaan yung circle mismo that is why hindi binasa nga makina,” tug-an niya sa SunStar Davao.
Gipahimug-atan ni Enumerables nga mga botante kinahanglan nga lukpon sa pag-shade ang lingin aron nga maseguro nga ang ilang boto sakto nga basahon sa ACM.
Gitakda ang 2025 National and Local Elections sa Mayo 12, 2025.
Sa maong adlaw, minilyon ka mga Pilipino gilauman nga mobotar sa mga presinto sa ilang tagsa-tagsa ka mga lugar. (Rojean Grace G. Patumbon)