COTABATO CITY -- Tumong nga mas mapakusgan pa ang kapasidad sa armadong kusog sa nasud, malig-on pa ang relasyon tali Estados Unidos ug Pilipinas ang gihimong Joint Fire Exercises sa Mindanao.
Ang U.S. Marines ug Philippine Marines mihimo sa joint live fire exercises sulod sa kanhi kampo sa MILF (Camp Abubakar) sa Barira, Maguindanao del Norte.
Matud ni 1st Marine Brigade Commander Eric Macaambac nga ang usa ka adlaw nga combat marksmanship drill nga gipahigayon ubos sa Marine Exercise gisalmutan sa 40 U.S. Marines gikan sa 11th Marine Expeditionary Unit ug 350 Filipino Marines, Navy, ug pulis.
Ang mga sundalong Pinoy gitakda usab nga mopailawom sa pagbansay-bansay sa maritime security operations, amphibious assault operations, counterterrorism ug special operations, lakip na ang air ug surface force insertion.
Usa sa tumong sa aktibidad nga mahanas pa ang kapasidad sa armadong kusog sa Pilipinas, alang sab sa pagpanalipud niini sa soberentiya. (EEF)