Agdao Coop sa Obrero gilusob
GILUSOB ang Agdao Multipurpose Cooperative, Obrero Branch, (Agdao Coop) sa gatusan ka mga miyembro nga diskontento ug kasamtangang mga opisyales niadtong Sabado sa gabii, Marso 29, 2025.
Armado og mga atsa ug mga gamit sa pamanday ang grupo, pangulohan matud pa sa usa ka Ronnie Sobridella, nanawagan sa resignasyon sa manedyer sa kooperatiba ug mga board members, nga ilang giakusar nga nagsurikbotsa pundo ug napakyas sa pagbalik sa kuwarta nga ilang giutang.
Sumala ni Bajada Police Station commander Police Major Marc Anthony Egos, sa paghinabi uban ang SunStar Davao, mga nagprotesta niatake sa gambalay sa kooperatiba, nagguba sa daghang mga pultahan aron sa pagpresyur sa mga board ug tagdumala nga manaug sa puwesto. Pangangkon nila nga ang board wala ulii ang kuwarta nga gisaad.
Si Egos, kuyog ni National Bureau of Investigation-Southeastern Mindanao (NBI-Semro) director Archie Albao, naghinabi ug nipasayon og panaghisgut tali sa mga nagprotesta nga grupo ug mga representante sa kooperatiba, naglakip sa legal counsel lawyers nga si Gibb Andrew Cabahug.
Dugang ni Egos nga atol sa negosasyon, ang kooperatiba nagpresentar og temporary restraining order (TRO) nga giisyu sa Court of Appeals niadtong Disyembre 17, 2024, uban ang petisyon alang sa preliminary injunction.
Human ang pipila ka oras sa dayalogo, mga nagprotesta nibiya sa gambalay sayo sa buntag niadtong Dominggo, Marso 30. Ang duha ka partido gilauman karon nga magpresenta sa ilang tagsa-tagsa ka mga legal nga argumento sa korte.
“Peaceful naman ang negotiations namo ilabina human nga nagpresenta og TRO ang taga-coop. Sa pagkakaron, magpasaka og kaso ang duha ka mga parties involved,” butyag niya.
Human sa insidente, gitin-aw sa kooperatiba nga mga nagprotesta mga kanhi empleyado kinsa nataktak ug gikonsidera nga absent without leave (AWOL).
“We regret to inform you that on the night of March 29, 2025, at approximately 9:00 PM, certain members, led by AWOL and terminated employees, forcibly entered the Agdao Coop Head Office. Unfortunately, this incident resulted in some damage to our property,” pahayag sa kooperatiba.
Gikanayon sa kooperatiba nga ang padayon nga kaso kasamtangan nga gidungog sa Court of Appeals, nga nag-ila sa kasamtangan nga tagdumala ug board members pinaagi sa Writ of Preliminary Injunction.
Nanawagan ang maong pahayag sa mga miyembro nga respetuhon ang balaod ug pabiling makalmahon, ug gipahimug-atan, “Ultimately, we all share the same goal — the welfare and prosperity of our cooperative.”
Kasamtangan, sumala sa tinubdan nga pamilyar sa maong sitwasiyon, nga kining mga indibiduwal nilihok "in defiance of a retaining status order" nga giisyu sa korte. Ang mando sa korte gipahimutang aron pagmentinar sa status quo hangtud ang mahimo ang pormal nga hukom. Apan mga kanhi empleyado, kinsa nagtuo nga ang ilang aksiyon gikinahanglan tungod sa nakaung-ong desisyon sa korte, pinugos nga miatake sa gambalay.
Ilang gilauman nga kung moisyu na ang korte sa ilang katapusang hukom, ang kooperatiba ideklara nga ilegal, ug sila ma-"vindicate" sa ilang paningkamot nga mopuli og kontrol. (David Ezra Francisquete)