COTABATO CITY -- Luya ang lawas sa agila o Philippine Serpent Eagle nga naluwas sa North Upi, Maguindanao del Norte, adlaw nga Martes, Hulyo 15, 2025.
Ang agila nga giingong nadakpan sa kabataan ang gitunol ngadto sa Community Environment, Natural Resources and Energy Office (CENREO) sa 1st District-Maguindanao del Norte.
Si North Upi Municipal Environment and Natural Resources (MENR) officer Loui Padua Lebeco mismo maoy unang nihatag og inpormasyon sa CENREO kalabot sa maong langgam.
Nipadala gilayon ang CENREO og response team sa maong dapit ug human sa makuting eksaminasyon, natumbok ang maong langgam nga usa ka Philippine Serpent Eagle.
Matud ni Erwin Gunsi, taga Barangay Upper Nangi, North Upi, nga pipila ka mga bata nga nanuroy sa Roma Falls maoy nakakita sa maong agila nga luya ug dili na makalupad.
Sumala pa nga ila dayon kining giatiman ug gitugyan ngadto sa lokal nga kagamhanan sa North Upi.
Ang nasangpit nga agila kasamtangang ubos sa pag-atiman sa wildlife rehabilitation facility sa Ministry of Environment, Natural Resources, and Energy (Menre) ug gitambalan aron mabalik ang kusog sa dili pa kini buhian balik sa natural habitat niini.
Miawhag ang Menre sa publiko nga i-report dayon ang mga kaso sa nasamdan, wala’y puy-anan, o sinagop nga mga hayop aron maseguro ang husto nga pag-atiman kanila. (Edgar E. Fuerzas)