MISMONG inahan ang nagpadakop sa iyang kaugalingon anak kay duna kini gidala-dala nga dakong bloke sa pinaugang dahon sa marijuana nga nagkantidad og P1.5 milyon, sa Purok 6-A, Aplaya, Bunawan, Davao City alas 11 sa kagahapon sa buntag, Agosto 10, 2025.
Ang suspetsado giila nga si Angelo, 20-anyos, ulitawo, usa ka construction worker, ug residente sa maong lugar.
Base sa imbestigasyon, mga alas 9:30 sa buntag, nitawag si Alice, 42-anyos, inahan sa suspetsado ngadto sa kapulisan aron ipadakop ang iyang anak gumikan sa kahimtang niini sa ilegal nga druga.
Gisaysay sa inahan nga nakahukom na siya nga iyang ipadakop dihang iyang nakaplagan ang usa ka bloke sa marijuana nga giputos sa transparent plastic cellophane nga anaa sa sulod sa pula nga JanSport backpack sa iyang anak.
Sa pagkahibalo sa mga pulis, daling nitungha sa lugar ang mga personahe sa PS6 Bunawan pinangulohan ni Police Captain Ramil Anthony Maxey ubos sa direktang pagmando ni P/Major Janus Lumbaya B. Macli-ing, ang acting Station Commander sa Bunawan PNP.
Gilayon nilang gidakop si Angelo ug nakumpiska ang usa ka bloke sa gituohang marijuana ug ang backpack nga gisudlan niini.
Ang suspek gikustodiya sa Bunawan Police Station alang sa hustong disposisyon.
Karong adlawa ipasaka ang kasong paglapas sa Republic Act (RA) 9165, Section 11 (Possession of Illegal Drugs) kun Comprehensive Dangerous Drug Act of 2002. (Jeepy P. Compio)
