LUPON, Davao Oriental -- Giabi-abi ug madasigong gidawat sa buhatan sa Commission on Elections (Comelec) sa Lupon, Davao Oriental ang pinakamaguwangang anak ni Senador Christopher Lawrence “Bong” Go diin gibalhin niini ang iyang voter’s registration.
Niadtong Marso 15, 2024, mipatim-aw sa buhatan sa Comelec-Lupon si Christian Lawrence “Chrence” Go aron sa pagbalhin sa iyang voter's registration sa maong munisipyo.
Sa impormasyon nga gipadala ngadto sa mga tigbalita, si Chrence migradwar sa iyang kursong Public Accountancy sa De La Salle University sa kaulohang Manila, isip Summa Cum Laude niadtong tuig 2019.
Ang batan-ong Go mao usab ang ikatulong dunay pinakataas nga score sa 2019 Certified Public Accountant (CPA) Licensure Examinations diin nakuha niini ang 89.50 percent.
Ang 25 anyos nga si Chrence unang narehistro isip botante sa Davao City diin nagpuyo iyang pamilya.
Gihimong kapasikaran sa pagbalhin ni Chrence sa iyang voter’s registration mao ang pamilya Go naggikan sa munisipyo sa Lupon diin unang nagpuyo ang lolo sa Dabawenyong senador.
Si Senador Go ang pinakaunang senador gikan sa Davao Oriental ug ikaduha gikan sa Davao Region sunod kang kanhing senador Alejandro Almendras.
Sama sa iyang amahan, si Chrence nakitaan usab og dakong potensyal ingon man kasing-kasing alang sa pagpanerbisyo sa katawhan.
Sa kasamtangan, nagtungha siya sa Ateneo de Manila University, School of Law ug gitakdang mo-gradwar karong bulan sa Hulyo 2024. (Jeepy P. Compio)