OPISYAL na nga gideklara sa Philippine Army 10th Infantry Division (10ID) ang tibuok nilang area of responsibility (AOR) nga wa nay aktibong rebelde sa New People's Army (NPA), human sa pagkaaresto sa katapusang mga miyembro sa Southern Mindanao Regional Committee (SMRC) sa Agusan del Sur.
Sa Davao Peace Security press briefing Miyerkules, Hunyo 18, 2025, gipahibalo ni 10ID Public Affairs Office Chief Major Ruben Gadut nga ang kanhi lig-ong presensiya sa NPA sulod sa ilang hurisdiksiyon nga kanhi gikutahan sa 16 ka aktibo nga guerrilla fronts napuhag na. Kini nga kalamboan nidugang sa nagpadayon nga paningkamot aron nga makasustiner ang insurgency-free status sa Davao Region.
Gipahimug-atan ni Gadut nga kining kalampusan nahitabo human ang malampuson nga hiniusang operasyon sa militar ug pulis niadtong Hunyo 13 sa Barangay Bunawan Brooke ug Purok 2, Barangay San Teodoro, Bunawan, Agusan del Sur. Ang operasyon niresulta sa pagka-aresto sa walo ka mga indibiduwal nga kaanib uban ang SMRC, gikonsidera nga katapusang nahabilin sa armadong grupo ubos sa NPA sa Southern Mindanao.
Mga naaresto mao sila Charisse Bernadine BaƱez, labing nailhan isip Nikki o Nikol, ang platoon secretary; Louvaine Erika Espina, alyas Pam o Tugas, medical officer sa unit; ug Ronnie Igloria, alyas Gideon, Rey, o Papang, kinsa nagsilbi isip vice commander. Ang ilang pagkasikop maoy hingpit nga nagpuhag sa katapusang yunit ilawom sa notadong Jaguar Platoon.
Ang lugar sa operasyon sa 10ID milangkob sa tibuok Davao Region ug mga bahin sa Northern Mindanao, Soccsksargen, ug Caraga. Kini naglakip sa nag-unang mga lugar sa Bukidnon, Sarangani, South Cotabato, Sultan Kudarat, North Cotabato, Surigao del Sur, ug Agusan del Sur.
Matud sa 10ID nga ang pagsugod sa 2025 nagtimaan og dagkong mga kalampusan alang sa Philippine Army, ilabi na sa Eastern ug Southern Mindanao. Gikanayon sa military unit, ang hingpit nga pag-neyutralisa sa aktibong elemento sa NPA sulod sa lugar sa 10ID usa ka testamento sa way puas nga operasyon sa militar ug epektibo nga koordinasyon sa Philippine National Police (PNP) ug uban pang security agencies. Ang kalampusan usab matampo ngadto sa padayong suporta sa local governments ug mga komunidad ilawom sa whole-of-nation approach sa pagtapos sa local communist armed conflict.
Bag-ohay lang, ang probinsiya sa Davao de Oro, usa sa mga lugar nga naa sa hurisdiksiyons a 10ID, nagsaulog sa ilang ikatulo ka tuig nga anibersaryo isip insurgency-free province.
Atol sa selebrasyon, ang provincial local government unit (PLGU) nagpahimug-at nga ang pagsustiner sa kalinaw ug kahusay makita isip modelo sa uban pang mga conflict-affected areas nga magtransisyon ngadto sa pagkalig-on. (David Ezra Francisquete)