GILAUMAN sa Municipal Government sa Asuncion sa Davao del Norte nga makatigum og igong gidaghanon sa gatas sa inahan alang sa "neonatal" nga mga masuso nga naa sa kritikal nga kondisyon nga nasulod sa Davao Regional Medical Center (DRMC) nga nakabase sa Tagum City.
Ang munisipyo sa Asuncion maoy unang local government unit sa probinsiya nga mipasiugda og "mass-letting" sa gatas gikan sa nagpatutoy nga mga inahan kinsa nanganak sa DRMC.
Dunay 40 kanila ang nisalmot sa "1st mass human milk letting" nga aktibidad nga gitawag og “Donate Breastmilk and Save Lives” nga gihimo niadtong Enero 22, 2025 sa Municipal Gym sa Asuncion, gidumala sa Asuncion Municipal Nutrition Office ug mga personahe sa DRMC.
Esplikar ni Municipal Nutrition Action Officer Joel M. Andoy sa abiso nga gipadala ngadto sa mga barangay, nga ang aktibidad gilusad “in line with Republic Act No. 11148 or the Kalusugan at Nutrisyon ng Mag-Nanay Act, and the memorandum of agreement (MOA) entered into by and between the DRMC and LGU of Asuncion as witnessed by the Barangay Officials and Functionaries” niadtong Nobyembre 20, 2024.
Sa pagsugod sa "human-milk mass-letting" nga gilusda, nidani kini sa pagsalmot sa mga nagpatutoy nga mga inahan gikan sa mga barangay sa Buclad, New Bantayan, Cambanogoy, Magatos, Cabaywa, ug Canatan sa Munisipyo sa Asuncion.
Nitunol ang Municipal Nutrition Office sa matag nisalmot nga inahan og lima ka kilo nga "staple rice" isip insentibo samtang ang DRMC nitunol ngadto sa matag usa og payong ug hygiene kit.
Atol sa kalihukan, si Municipal Mayor Atty. Eufracio Dayaday Jr. nagsulti nga way igong kantidad nga insentibo nga mahatag ang LGU isip bugti sa gidonar nga gatas sa mga nagpatutoy nga mga inahan nga itabang sa mga masuso sa nga nanginahanglan sa gatas sa inahan.
“Ang inyong paghatag is an act of kindness. Ako nanghinaut nga kining programa mamalahutayon ug magmalampuson,” nagalaum ang mayor.
Nilusad ang DRMC sa ilang Human Milk Donation Program niadtong Hulyo 17, 2023 aron nga makakuha og suporta gikan sa komunidad sa mga inahan alang sa mga masuso nga naa sa kritikal nga kondisyon apil ang mga masuso nga biktima sa katalagman ug emerhensiya.
Gisulti ni DRMC Medical Center Chief, Dr. Bryan O. Dalid sa niaging pakighinabi kaniya nga ang milk donation program nagsugod lang sa ospital, apan tungod sa di igo nga suplay, hinungdan nga DRMC nidangop sa mga ginikanan sa komunidad aron nga makakuha og gatas.
“The supply was not enough due to the increasing number of babies in our NICU, that’s Neonatal Intensive Care Unit (NICU). We went out to Barangay Apokon (Tagum City) but still it’s not sufficient,” tug-an niya ngadto sa PIA XI atol sa gilunsad nga seremonya niadtong 2023.
Samtang ang local government sa Asuncion nagpalit na og freezer aron ibutang ang mga gatas sa inahan kay tinguha nilang dalhon ang kampanya ngadto sa barangay levels nga “Donate Breastmilk and Save Lives.”
Nagpagawas si Dayaday og Executive Order No. 01 series of 2025, nagmugna sa Municipal Structure of Coordination on Human Milk Donation Program.
Gibutyag ni DRMC Human Milk Donation Program coordinator and Health Education Promotion Officer (HEPO), registered nurse Agnes Catoera nga kini nga programa mao ang “brainchild of DRMC” nga ubang mga ospital sa Department of Health (DOH) buot sundogon.
Matud niya nga ang Asuncion mao ang unang LGU sa Davao del Norte nga opisyal nga nagpasiugda sa programa, nga magsilbi sab nga paagi sa pagsubay sa mga nagpatutoy nga inahan nga nakagawas na gikan sa DRMC. (Philippine Information Agency XI)