Asunto ni Paolo, Carpio 'political attacks'

GIKONSIDERA ni Vice President Sara Duterte nga mga kaso nga gipasaka batok sa iyang bana, Manases Carpio, ug iyang igsuon, Davao City First District Representative Paolo “Pulong” Duterte, isip “political harassment” ug “political attacks.”

“Hindi lang diyan sa kaso ng nafinile sa kanila, lahat ng ito ay political harassment, political attacks, nakikita niyo naman, lumabas siya nung umalis ako sa DepEd [Department of Education], lumabas siya nung nagsasalita na ako kung anong dapat ginagawa natin para sa ating bayan,” matud ni Duterte sa paghinabi kaniya sa mga tigbalita niadtong Sabado, Agosto 17, 2024, sa Davao City Library & Information Center.

Naglaum si Duterte nga katawhang Pilipino di malimot nga ang tinuod nga mga isyu mao ang kakabus ug ang pagtaas sa presyo sa pagkaon, kay kini ang batakang panginahanglan sa katawhan. Iyang gipadagyag nga ang publiko di makahir sa kabanha apan kinahanglan nga motutok sa tinuod nga mga problema nga giatubang sa nasud.

Iya sab nga gihisgutan bahin sa gialegar nga kalambigitan ni Carpio sa "multi-billion-peso shabu shipment" nga nasakmit niadtong 2018, matud niya si Carpio lang ang makatubag niini.

“Napag-usapan din ng aking asawa na si Mans Carpio na kung ano yung sa kanya na issue siya lang sasagot at kung ano yung sa akin yun lang din ang sasagutin ko para klaro yung mga linya ng pagsasagot,” butyag niya.

Dugang pa sa bise presidente nga di sab siya mokomentaryo bahin sa iyang igsuon, Paolo ug nakapagawas na kini og pahayag bahin sa maong hisgutanan.

Kahinumdoman, nga sila si Paolo ug Carpio naangin sa pahayag nga gihimo ni Jimmy Guban, kanhi opisyal sa Bureau of Customs, atol sa "joint congressional hearing" niadtong Agosto 16, 2024. Giangkon ni Guban nga ang "multi-billion-peso shabu shipment" nga nasakmit niadtong 2018 gikan kanila. Si kanhi presidential economic adviser Miachel Yang gialegar nga nalambigit sa samang isyu. (Rojean Grace G. Patumbon)