Aswang nanglili, gikalisang

Aswang nanglili, gikalisang
File photo

SOUTH COTABATO -- Gikalisang sa molupyo sa Barangay Topland sa Koronadal City sa nahisgutang probinsiya ang giingon nga pagpakita sa aswang sugod pa niadtong Dominggo sa gabii hangtud kagahapon, Martes, Marso 11, 2024.

Dunay usa ka molupyo sa maong barangay nga niasoy nga iyang nakita ang usa ka aswang nga puti ang mata ug itom ang balahibo nga nidungaw sa bintana sa ilang balay.

Nakasiyagit og nangayo og tabang si alyas Arlene sa iyang nakita nga aswang, hinungdan nga nangahadlok sab ang iyang mga silingan.

Gawas kang alyas Arlene, dunay lain pang laing taga Barangay Topland nagsulti nga nipakita sab kanila ang aswang nga nisilip sa atop sa ilang balay.

Sagad sa gipakitaan sa giingong aswang kadtong matud pa mga balay nga dunay nagpuyo nga buntis o kaha bag-o lang nanganak apan wala man sab manghilabot kanila.

Gituohan nga posibleng nanubay lang daan ang maong aswang sa iyang biktimahon aron nga mas dali na lang kaniya makuha ang iyang tumong.

Samtang gikompirma ni Barangay Topland Kapitan Terrence Ehimplar ang gisugilon sa iyang mga silingan apan mismo siya dili makatuo niini gumikan kay wala siya makakita sa aswang mismo.

Hinuon, aron makunhoran ang kahadlok sa molupyo sa maong barangay, gihingusgan sa mga miyembro sa Barangay Peacekeeping Action Team (BPAT) ang ilang pagpatrolya matag gabii aron nga subayon kung unsa gyud katinuod nga dunay aswang nga nanghadlok sa ilang barangay, ilabi na sa mga mabdos ug bag-o pang nanganak. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph