GOOD news kay makadawat og pinansiyal nga ayuda ang kapin 800 ka senior citizens sa Davao City ilawom sa gipalapdan nga Centenarian Subsidy Program nga ipahigayon Hulyo 22 hangtud 24, 2025 sa People's Park.
Sumala ni Lorenzo Borja, hepe sa Office of the Senior Citizen Affairs (Osca), mga kuwalipikadong benepisyaryo mao ang mga seniors nga nagselebrar sa ilang ika-80, ika-85, ika-90 ug ika-95 nga adlaw’ng natawhan gikan Enero 1 hangtud Mayo 31 karong tuiga ug nalista nang daan sa ilang buhatan.
Ang payout magsugod alas 8:00 sa buntag hangtud alas 3:00 sa hapon, first-come, first-served basis, suma sa taho sa City Information Office.
Ang eskedyul sa payout mao ang mosunod: Hulyo 22 alang sa mga senior nga nagpuyo sa First District Poblacion A & B, Talomo A & B; Hulyo 23, alang sa Second District sa Agdao, Bunawan, Buhangin A & B, Paquibato; samtang sa Hulyo 24 alang sa Third District nga mao ang Baguio, Calinan, Marilog, Toril A & B, ug Tugbok.
Kinahanglan dad-on sa mga claimants ang photocopy sa ilang Osca ID ug tulo ka specimen signature. Ang mga bedridden nga seniors mahimong ipadawat sa ilang paryente pinaagi sa authorization form nga makuha sa Osca office sa Sangguniang Panlungsod Building.
Dugang pa ni Borja, ang mga seniors nga magsaulog sa milestone birthdays gikan Marso 17 hangtud Hunyo 30, 2024, mahimong magparehistro sa Osca pinaagi sa pagpakita sa ilang Osca ID ug usa pa ka valid government-issued ID sama sa National ID, SSS ID, o Voter’s ID.
Magpagawas og laing eskedyul ang Osca alang sa mga seniors nga magselebrar sa ilang milestone birthdays human sa kasamtangang coverage.
Alang sa dugang kasayuran, mahimong motawag sa (082) 222-8061 o (082) 241-1000 local 394, mag-email sa osca@davaocity.gov.ph, o moadto sa ilang buhatan sa ground floor, Sangguniang Panlungsod. (JPC/CIO)