ARESTADO ang usa ka babaye kinsa gikonsidera nga Top 3 Regional Level nga high value individual (HVI) sa giimplementar nga search warrant sa hiniusang puwersa sa kapulisan.
Atol sab sa operasyon, nasakmit gikan sa suspek ang shabu nga dunay standard drug price nga P1,040,400 sa Bago Uma, Menterbro, Barangay Ilang, Davao City alas 3:05 sa kagahapon, Lunes, Agosto 4, 2025.
Giila ang naaresto nga si alyas Am-Am, 31-anyos, minyo, way trabaho, ug molupyo sa Bago Uma, Menterbo, Barangay Ilang.
Nasayran nga giimplementar ang search warrant sa hiniusang operatiba gikan sa Regional Police Drug Enforcement Unit 11 (RPDEU XI), City Drug Enforcement Unit/Special Operation Group (SOG) sa Davao City Police Office; City Intelligence Unit (CIU), City Mobile Force Company-Special Weapons and Tactics (SWAT) Team, ug Bunawan Police Station nga gilagdaan ni Executive Judge Rowena M. Apao-Adlawan nga niresulta sa pagkaaresto sa nahisgutang suspek.
Nakuha nga mga ebidensiya gikan sa suspek atol sa operasyon mao ang usa ka heat-sealed transparent plastic sachet nga nagbaton og gituohang shabu; upat ka lain pang heat-sealed transparent plastic sachet nga dunay sulod sa gituohang shabu; usa ka coin purse nga kolor maroon; tulo ka P100 nga papel; usa ka sling bag, kolor brown; ug usa ka yunit sa Armscor .38 Rev202 nga dunay karga nga duha ka buhing bala.
Ang nahisgutang mga ebidensiya gimarkahan ug gipailawom sa pag-inbentaryo uban ang presensiya sa mga saksi nga gimando sa balaod, atubangan mismo sa suspek.
Sa pikas bahin, laing babaye sab ang naaresto sa kapulisan sa Sta. Police Station human nga nagpataya ug nidawat og pusta sa illegal numbers game nga nailang Last Two sa Purok 3, Barangay 23-C, Davao City ala 1:45 sa hapon sa samang adlaw.
Sa dihang naaresto ang suspek, nakuhaan sab kini og gituohang shabu nga gibana-bana nga standard drug price nga P44,880.
Ang suspek nailhan nga si alyas Crystal , 22-anyos, dunay kapuyo, ug molupyo sa Purok 8, Sta. Cruz, Barangay 21-C, Davao City.
Nakaaresto sa suspek mao ang personahe sa Sta. Ana Police Station human maaktuhi nga nagpataya ug nangolekta og pusta sa Last Two.
Mga ebidensiya nga nakuha mao ang usa ka improvised Last-Two receipt/kotejo uban sa bet number 12 ug pusta nga kantidad og P50; P50 nga kuwartang papel isip pusta; usa ka Flextick bolpen; usa ka pad improvised last-two stub nga dunay carbon paper; duha ka tag P50 nga papel gituohang kita sa sugal; usa ka sling bag, kolor brown; ug duha ka elongated shape heat-sealed transparent plastic sachet nga nagbaton og gituohang shabu.
Ang niaresto nga pulis naggamit og alternatibong "recording device" kon diin ang suspek gipahibawo sa iyang mga katungod gamit sab sa pinulongan nga iyang masabtan ug ang hinungdan kung nganong giaresto siya.
Ang suspek ug ang mga ebidensiya nga nakuha naa na karon nakakustodiya sa Sta. Ana Police Station alang sa tukmang pagpasang-at og mga kaso.
Samtang ang nasakmit nga gituohang shabu gitunol ngadto sa Davao City Forensic Unit. (Wenz G. Mendoza)