DAVAO DEL NORTE -- Dakpan ang babaye nga gikonsidera nga most wanted person sa station level tungod sa patong-patong nga mga kasong estafa niadtong Dominggo, Hulyo 27, 2025.
Ang suspek, kinsa nadakpan pinaagi sa implementasyon sa warrant of arrest, giila nga si alyas Nanz, 34-anyos, dalaga, molupyo sa Purok Sampaguita, Barangay Veruela, Agusan del Sur, kon diin naaresto siya bandang alas 12:15 sa udto sa maong adlaw sa Purok 1-D Assessor Village, Barangay Apokon, Tagum City.
Gisilbi ang warrant of arrest batok sa suspek sa mga personahe sa Tagum City Police Office uban ang pakigtimbayayong sa Criminal Investigation and Detection Group (CIDG) sa Davao City Field Unit.
Nasayran nga ang akusado dunay nakaung-ong nga mga warrant of arrest sa mga kasong estafa kon diin ang una giisyu ni Presiding Judge Catyherine Guerzo-Barrion sa Municipal Trial Court in Cities, Branch 4, Davao City pinetsahan og Hunyo 1, 2023 nga dunay girekomenda nga piyansa nga P3,000 alang sa temporaryong kagawasan; ikaduha giisyu ni Presiding Judge Sol Marie Andoy Gawiden sa Municipal Trial Court in Cities, Branch 1, Davao City pinetsahan og Disyembre 14, 2023 nga dunay piyansa nga P18,000; ikatulo giisyu ni Assisting Judge Clarissa M. Superable Develos sa Municipal Trial Court in Cities, Branch 3, Davao City pinetsahan og Abril 24, 2024 nga dunay girekomenda nga piyansa nga P12,000; ikaupat giisyu ni Acting Presiding Juege Marisue Almario Llanes sa MTCC, Branch 2, Davao City pinetsahan og Nobyembre 10, 2023 nga dunay piyansa nga P12,000.
Ikalima nga warrant of arrest tungod sa kaso pa gihapong estafa giisyu ni Assisting Judge Lailani Marzo Vagilidad sa MTCC, Branch 5, Davao City pinetsahan Oktubre 27, 2023 nga dunay piyansa nga P5,000; ikaunom giisyu ni Assisting Judge Gawiden sa MTCC, Branch 1, sa Davao City pinetsahan og Disyembre 14, 2023 nga dunay piyansa nga P18,000; ug ang ikapito giisyu ni Acting Presiding Judge Mark Louie L. Zabal sa MTCC, Branch 6, Davao City uban ang piyansa nga P18,000 alang sa temporaryo niyang kagawasan.
Samtang laing kaso nga giatubang sa suspek mao ang kalapasan sa The Securities Regulation Code, hinungdan nga gipagawsan kini og warrant of arrest nga giiyu ni Acting Presiding Judge Retrina A. Espe Fuentes sa Regional Trial Court, Branch 10, Davao City pinetsahan og Mayo 8, 2023 nga dunay piyansa nga P126,000.
Sa dihang gidakop ang suspek, gipahibawo siya sa mga nalapas niini nga balaod apil na ang iyang mga katungod.
Ang suspek naa na karon sa kustodiya sa Sta. Ana Police Station (Police Station 1) ubos sa Davao City Police Office alang sa tukmang disposasyon sa iyang mga kaso. (Wenz G. Mendoza)