BLANGKO pa ang mga awtoridad sa motibo sa pagpusil patay sa babaye alas 2:00 sa hapon, Sabado, Mayo 25, 2024, sa General Santos City.
Giila ang biktima nga si Sharry Sanggayan, 32-anyos, ug nagpuyo sa Purok Bliss Extension, Barangay Calumpang, General Santos City.
Sumala ni General Santos City Police Office (GSCPO) Director Colonel Nicomedes Olaivar Jr. nga nag-inom ang biktima, uban ang iyang mga silingan nga babaye, apan kalit lang nibutho ang nag-inusarang wala mailhing tawo ug gipusil siya.
Abtik sab nga niiktad ang suspek nga nisakay og motorsiklo sa naghulat niining kauban daplin sa kalsada.
Tungod sa kalit nga hitabo, mga kauban ni Sanggayan nga nag-inom nagkatibulaag sa pagpanagan.
Patay on the spot ang biktima nga nakaangkon og samad pinusilan sa ulo ug dughan.
Kapulisan sa GSCPO padayon pang nagsubay sa hitabo aron nga mailhan ug madakpan ang mamumuno. (Edgar E. Fuerzas)